Tags-Sahil

phir bhī vahī sailāb-e-havādis jaane do ai sāhil vaalo
yā is baar safīna Duubā yā us ke mañjdhār nahīñ hai

vahī maujeñ jo mujh ko khīñch kar laa.ī haiñ tūfāñ meñ
unheñ maujoñ ke saath ik roz meñ pahuñchūñgā sāhil par

phir koī kam-baḳht kashtī nazr-e-tūfāñ ho ga.ī
varna sāhil par udāsī is qadar hotī nahīñ

jis ġham se dil ko rāhat ho us ġham kā mudāvā kyā ma.anī
jab fitrat tūfānī Thahrī sāhil kī tamannā kyā ma.anī

musāfir apnī manzil par pahuñch kar chain paate haiñ
vo maujeñ sar paTaktī haiñ jinheñ sāhil nahīñ miltā

dāstāñ yuuñ badal ga.ī hogī
mauj sāhil nigal ga.ī hogī

sāhil pe jo utrā thā safīnoñ ko jalā kar
sadiyoñ se phir aisā koī lashkar nahīñ utrā

duur sunsān se sāhil ke qarīb
ek javāñ peḌ ke paas

mohabbat meñ jo Duubā ho use sāhil se kyā lenā
kise is bahr meñ jā kar kināra yaad rahtā hai

naddī meñ chhupā chāñd thā sāhil pe ḳhamoshī
har rañg lahū-rañg kā zindān banā thā

lauT aa.iiñ phir se kashtiyāñ tūfāñ se haar kar
vīrāñ bahut dinoñ mirā sāhil nahīñ rahā

mirī qismat meñ sāhil hai yā tūfāñ
hathelī par samundar hai nahīñ hai

dam toḌtī maujeñ kyā sāhil kā pata deñgī
Thahrī huī kashtī hai ḳhāmosh hai tūfāñ bhī

maar hī Daalā thā sāhil ke maraz ne mujh ko
ek sailāb achānak hī shifā-ḳhāna banā

vo the javāb ke sāhil pe muntazir lekin
samay kī naav meñ merā savāl Duub gayā

dariyā-e-ġham meñ shahr kā har fard ġharq thā
sāhil ke ās-pās fazā mātamī sī thī

jo dal ke samundar se ubhartā hai yaqīñ hai
jo zehan ke sāhil se guzartā hai gumāñ hai

balliyoñ fart-e-masarrat se uchhal jaatā hai dil
bahr-e-ġham meñ duur se dāmān-e-sāhil dekh kar

kitnā gahrā sannāTā hai sāhil par
lahroñ se tūfān uThe to uThne do

chāñd thā sāhil-e-nafas ke qarīb ek din mere dil meñ Duub gayā
sub.h kā raaz rā.egāñ Thahrā shaam bhī ghul ga.ī tamāshe meñ