Tags-Sahil

un kā jalva dekhte hī uḌ ga.e hosh-o-havās
kashtiyāñ sāhil se lag kar nazr-e-tūfāñ ho ga.iiñ

'dānish' mire sharīk-e-safar haiñ vo kaj-mizāj
sāhil ne jin ko pheñk diyā hai bahāv par

mauj-e-balā meñ roz koī Dūbtā rahe
sāhil har ek baar magar dekhtā rahe

yāroñ kī kashtiyāñ rahīñ sāhil se be-niyāz
tūfāñ se be-niyāz agar nāḳhudā rahe

likhī hai reg-e-sāhil par jo maiñ ne
vo chiTThī paḌh nahīñ saktā samundar

peshāni-e-sāhil pe koī naam na ubhre
har mauj samundar kā likhā kaaT rahī hai

dil ko sukūn-e-pasti-e-sāhil se kyā ġharaz
har azm hai bulandī-e-tūfāñ liye hue

mire haath bhī zaḳhm-e-dil kī tarah maiñ TuuT gayā sāhil kī tarah
ai dard-e-ġham-e-hijrāñ tū ne kyā mujh ko diyā kyā chhīn liyā

dho.e haiñ dhobī ne dariyā meñ jo kapḌe yaar ke
aaj kosoñ tak mo.attar dāman-e-sāhil huā

mauj-dar-mauj hai an-dekhe jazīroñ kā fusūñ
tū ne shab bhar mujhe sāhil pe pukārā hogā

sāhil se har ḳhushī kā nazāra fuzūl hai
tūfān-e-ġham meñ rah ke bhī himmat se baiThiye

kitnī be-kaif haiñ sāhil kī fazā.eñ yā rab
koī tūfān kā ruḳh moḌ de sāhil kī taraf

bas ek pal meñ miTā deñgī sar-phirī maujeñ
gharauñde ret ke sāhil pe kyuuñ banātā hai

minnat-e-sāhil bhī sar le lī bhañvar meñ Dolte
haañ ye hiila bhī hameñ bahr-e-sukūñ karnā paḌā

lab-e-sāhil pe to 'mumtāz' na mil paayā sukūñ
sail-e-tūfān-e-havādis se guzar kar dekho

imkān sā kholā huā sāhil kī havā par
ummīd sī bāñdhī huī us paar se ham ne

apne kirdār pe maujoñ ko bhī sharm aatī hai
jab koī Duub ke sāhil kā patā detā hai

hai khaḌā sāhil pe lahroñ se pare
paar jaane par vo āmāda nahīñ

khaḌā huuñ sūrat-e-dīvār reg-e-sāhil par
zarā sī mauj bhī aa.e to ghul ke bah jā.ūñ

ki bahr-e-be-karāñ hai vo tabhī sāhil nahīñ miltā
tabhī sāhil nahīñ miltā ki bahr-e-be-karāñ hai vo