Tags-Sahil

nigahbāñ the jo sāhil par hamārī kashtiyoñ ke
vo sab ke sab sar-e-girdāb ruḳhsat ho ga.e haiñ

Dūbne jā.egā shāyad koī māyūs visāl
majma-e-ām sunā hai lab-e-sāhil hogā

yādoñ kā ik hujūm thā tanhā nahīñ thā maiñ
sāhil kī chāñdnī meñ samundar sharāb pī

sāhil kī ret chāñd ke muñh par na Dāliye
himmat jo ho to bahr se motī nikāliye

talātum-ḳhez dariyā aur ye sāhil se nazzāra
har ik mauj-e-talātum be-karāñ ma.alūm hotī hai

kyuuñ dauḌ ke aatī haiñ idhar maujeñ musalsal
kyā kam hai samundar meñ jo sāhil meñ chhupā hai

ahl-e-sāhil se nadāmat sī nadāmat hai ki ham
ek kashtī-e-tah-e-āb kā sāmān bane

log sāhil pe Duub jā.eñge
tum samundar pe iktifā karnā

Thahro aur ek nazar vaqt kī tahrīr paḌho
reg-e-sāhil pe ram-e-mauj ne likhā kyā hai

samundar ye tirī ḳhāmoshiyāñ kuchh aur kahtī haiñ
magar sāhil pe TuuTī kashtiyāñ kuchh aur kahtī haiñ

kis vāste sāhil pe khaḌe ho shashdar
hāthoñ meñ liye tīra-dilī ke patthar

mausīqī-e-husn kī maujeñ thī kuchh āñkhoñ meñ kuchh pyāloñ meñ
jo sāhil-e-dil tak ho aa.eñ yādoñ ke ek safīne meñ

jitne saaqī the mire sab nazr-e-tūfāñ ho ga.e
aur kosoñ duur hai sāhil kise āvāz duuñ

jab shaam utartī hai kyā dil pe guzartī hai
sāhil ne bahut pūchhā ḳhāmosh rahā paanī

karachi kisī dev-qad kekḌe kī tarah
samundar ke sāhil pe paañv pasāre paḌā hai

Dūbne vaale ko sāhil se sadā.eñ mat do
vo to Dūbegā magar Dūbnā mushkil hogā

aa gayā lījiye sāhil-e-hastī
maiñ baḌe imtihān se niklā

Dūbtā hī rahā aur ḳhāmosh thā
dekhtā rah gayā der sāhil mujhe

a.amāl-e-'habīb'-e-jigar-afgār kī kashtī
sāhil pe pahuñch jā.egī ashkoñ kī tarī se