Tags-Sahil

dil kā haal paḌhā chehre se
sāhil se lahreñ ginte ho

bāzgasht-e-shor-e-ġharqābī sahī
koī to āvāz sāhil se uThī

dimāġh kyuuñ na ho sāhil pe sone vāloñ kā
kabhī kabhār jo tūfāñ kī sarzanish hī nahīñ

ye kaun hai sar-e-sāhil ki Dūbne vaale
samundaroñ kī tahoñ se uchhal ke dekhte haiñ

chaḌhte tūfān ko sāhil se guzarnā thā miyāñ
riit ke ghar ko bahar-hāl bikharnā thā miyāñ

sāhil kī baḌhā ke tishnagī mauj
dariyā kī taraf palaT ga.ī hai

nā-ḳhudāoñ pe bharosa na Dubo de 'āmir'
qurb-e-sāhil jo tujhe degā ḳhudā hī degā

vaqt kā dariyā le bhī gayā vo sab jo dil-o-jāñ se thā aziiz
DhūñDh rahe ho sāhil par ab aañsū kī tahrīr kahāñ

mujhe dars-e-sukūñ dete haiñ vo josh-e-tamannā meñ
udhar tūfāñ kī ḳhvāhish hai idhar sāhil kī bāteñ haiñ

har qatra dariyā banñe ko betāb dikhā.ī detā hai
har mauj-e-ravāñ bechain nazar aatī hai firāq-e-sāhil meñ

mauj-dar-mauj miT rahā huuñ maiñ
kaun sāhil pe likh gayā hai mujhe

tūfāñ se bach ke Duubī hai kashtī kahāñ na pūchh
sāhil bhī e'tibār ke qābil nahīñ rahā

ba-sail-e-ashk laḳht-e-dil hai dāman-gīr mizhgāñ kā
ġharīq-e-bahr jūyā-e-ḳhas-o-ḳhāshāk-e-sāhil hai

maiñ ne sar-e-girdāb ka.ī baar pukārā
sāhil se magar log baḌī der se bole

samundar meñ chhupe haiñ kitne tūfāñ
ye sāhil ko bhī andāza nahīñ hai

ḳhayāl-e-sāhil o fikr-e-tabāh-kāri-e-mauj
ye sab hai phir bhī tamannā-e-nāḳhudā to nahīñ

Duub jaate haiñ talātum meñ safīne akasr
Dūbtā aur hī kuchh baat hai sāhil ke qarīb

girdāb sāmne hai muḳhālif havā.eñ haiñ
kashtī ko kaise jānib-e-sāhil ghumāoge

khaḌe haiñ sāhil-e-hastī pe ham
jiine ke be-pāyāñ bahāne chhoḌ aa.e