Tags-Sahil

tūfāñ se khelne kā rahā shauq umr bhar
sāhil pe jis ne mujh ko utarne nahīñ diyā

tumhārā naam phir sāhil pe likkhūñ
lahr se aane pahle ḳhud miTā.ūñ

tūfān kī maujoñ meñ ghir kar pahuñchā bhī hai koī sāhil tak
sab yaas ke aalam meñ dil ko samjhāne kī bāteñ hotī haiñ

kisī girdāb kī pheñkī paḌī hai
lab-e-sāhil jo ik kashtī paḌī hai

shaam sāhil pe gum-sum sī baiThī huī
aur dariyā meñ sonā bikhartā huā

tanhā.ī ke āb-e-ravāñ ke sāhil par baiThā huuñ maiñ
lahreñ aatī jaatī rahtī haiñ dekhā kartā huuñ maiñ

jo kashtiyoñ ko Dubotā hai lā ke sāhil par
tumhī batāo use nāḳhudā kahūñ kaise

tamām kashtiyāñ sāhil pe haiñ abhī Thahrī
abhī se in ko jalāne kā va.ada kyā karnā

nāḳhudā be-ḳhud fazā ḳhāmosh sākit mauj-e-āb
aur ham sāhil se thoḌī duur par Duubā kiye

ik naam kyā likhā tirā sāhil kī ret par
phir umr bhar havā se merī dushmanī rahī

juz hirs-e-manfa.at tah-e-dariyā bhī kuchh na thā
juz vahm-e-āfiyat lab-e-sāhil bhī kuchh nahīñ

maiñ dariyā huuñ magar donoñ taraf sāhil hai tanhā.ī
talātum-ḳhez maujoñ meñ mirī shāmil hai tanhā.ī

do saa.e pahle ākāsh tale sāhil par baiThe the
lahroñ ne lipTānā chāhā aur bechāre Duub ga.e

sayyāroñ meñ sāhil hai vo azmat tujh ko
kartī hai salām jhuk ke rif.at tujh ko

jis shaḳhs ko aatā thā hunar nauhagarī kā
vo shaḳhs bhī ab ke lab-e-sāhil nahīñ Thahrā

tūfāñ se bach ke dāman-e-sāhil meñ rah gayā
mushkil ke ba.ad aur bhī mushkil meñ rah gayā

sāhil pe Dūbne lagī āb-e-ravāñ kī lau
barpā thā zard ret kā tūfān chār-sū

kahīñ nazar meñ nahīñ duur duur tak sāhil
bhañvar kī naav ke mānind jaan hai tan meñ

ab maiñ sāhil pe nahīñ maiñ huuñ tah-e-āb-e-ravāñ
shahr-dar-shahr haiñ hoñToñ pe fasāne mere

bagūle aag ke raqsāñ rahe tā der sāhil par
samundar kā samundar chhup gayā uḌte sharāroñ se