Tags-Sahil

balā se kitne hī tūfāñ uThe bahr-e-mohabbat meñ
har ik dhaḌkan ye kahtī hai mirā sāhil hai tū hī tū

ik mahviyat ki hairat-e-sāhil hai har taraf
ik kaifiyat ki saarā samundar shikasta hai

niklā thā kis kī naav meñ sāhil ke chaav meñ
ab tak huuñ maiñ bahāv meñ lañgar shikasta hai

aaj apnī 'nazar' se vo dekheñ ye silsila-e-tūfāñ aa kar
kal kahte the jo hairāñ ho kar sāhil pe bhī tūfāñ kyā hogā

vo yaad ke sāhil par saare motī bikhrā.e baiThī thī
ik lahar lahū meñ uTThī thī mujhe tāza-dam karne ke liye

mauj mauj tūfāñ hai mauj mauj sāhil hai
kitne Duub jaate haiñ kitne bach nikalte haiñ

dard kī ik lahr bal khātī hai yuuñ dil ke qarīb
mauj-e-sar-gashta uThe jis tarah sāhil ke qarīb

kuchh to ai nazzārgān-e-aish-e-sāhil boliye
kashtiyāñ kitnī huiiñ ġharqāb sāhil ke qarīb

tumhārī mushkileñ āsāñ huī haiñ Dūbne vālo!
mujhe dekho ki saarī umr sāhil par rahā huuñ maiñ

kahānī ko mukammal jo kare vo baab uThā laa.ī
maiñ us kī aañkh ke sāhil se apne ḳhvāb uThā laa.ī

fazā-e-sāhil-e-ummīd agar kuchh raas aa jaatī
to ham kyuuñ nazr-e-tūfāñ kashti-e-umr-e-ravāñ karte

suno samundar kī shoḳh lahro havā.eñ Thahrī haiñ tum bhī Thahro
vo duur sāhil pe ek bachcha abhī gharauñde banā rahā hai

mumkin hai umr bhar kī thakan nazr-e-lahr ho
sāhil kī ret par mujhe sustānā chāhiye

us ke badan kā loch thā dariyā kī mauj meñ
sāhil se maiñ bahāv ko taktā hī rah gayā

shahr vāloñ ko to jaise kuchh patā chaltā nahīñ
roktā rahtā hai sāhil roz-o-shab tūfān ko

aql kā hukm ki sāhil se lagā do kashtī
dil kā isrār ki tūfāñ se laḌā dī jaa.e

ilm ke dariyā se nikle ġhota-zan gauhar-ba-dast
vaa.e mahrūmī ḳhazaf chain lab sāhil huuñ maiñ

ye vaqt kā be-karāñ samundar maiñ us kī had tak pahuñch na paayā
girā thā sāhil pe TuuT kar jo huā thā jo ġharq-e-āb maiñ huuñ

nāḳhudā kashtī ko sāhil se lagātā bhī nahīñ
beach dariyā meñ utarne bhī nahīñ detā hai

phir chalī jaatī hai dariyā kī khulī āġhosh meñ
mauj-e-sāhil par khaḌī do-pal machal jaane ke ba.ad