Tags-Sahil

bahr-e-mohabbat ke sāhil kī sair bahut kar lī ham ne
aao zarā ab ham bhī dekheñ baiTh ke pyaar kī kashtī meñ

apnī taqdīr ko rote raheñ sāhil vaale
jin ko aanā thā vo mañjdhār tak aa pahuñche haiñ

banāyā ishq ne dariyā-e-nā-paidā-karāñ mujh ko
ye merī ḳhud-nigah-dārī mirā sāhil na ban jaa.e

kaisā insāñ taras rahā hai jiine ko
kaise sāhil par ik machhlī zinda hai

baat sāhil kī rakhe TuuTā shikārā dekh le
paas to majdhār hai kyuuñ kar kinārā dekh le

asar kare na kare sun to le mirī fariyād
nahīñ hai daad kā tālib ye banda-e-āzād

morche kholtā rahtā huuñ samundar ke ḳhilāf
jis ko miTnā hai vo aa.e mirā sāhil ho jaa.e

mauj-e-tūfāñ-ḳhez uTh kar chhīn le sāhil kī aas
nāḳhudā ke aate aate kyā ḳhudā jaane bane

agar aatā huuñ sāhil par to āñdhī gher letī hai
samundar meñ utartā huuñ to tuġhyānī nahīñ jaatī

mauj-e-talātum ḳhair haiñ ham sāhil ke qarīb aate hī nahīñ
vaqt kī rau meñ bah jaa.eñ ham aise ḳhas-o-ḳhāshāk nahīñ

ḳhvāhish pe mujhe TuuT ke girnā nahīñ aatā
pyāsā huuñ magar sāhil-e-dariyā pe khaḌā huuñ

sāhil sāhil bhīgī ret pe chaltā thā
sahrāoñ meñ Tāñgeñ toḌ ke baiThā huuñ

jism kā husn tirī ruuh talak hai sāhil
ye nahīñ ho to ye miTTī kī imārat kyā hai

abas DhūñDā kiye ham nā-ḳhudāoñ ko safīnoñ meñ
vo the āsūda-e-sāhil mile sāhil-nashīnoñ meñ

hoshiyār ai mast-o-madhosh-e-javānī hoshiyār
ishq vo dariyā hai jo minnat-kash-e-sāhil nahīñ

ḳhudā ke naam se tūfān meñ kashtī utārī
bhañvar jitne samundar meñ the, sāhil ho ga.e haiñ

jo rañg-e-ishq se fāriġh ho us ko dil nahīñ kahte
jo maujoñ se na Takrā.e use sāhil nahīñ kahte

miTTī se banāyā thā jo sāhil pe gharauñdā
kuchh bachche use bāra-darī karne lage haiñ

barf bhī sīmāb bhī sāhil bhī hai girdāb bhī
ye tazād-e-ḳhāsiyat ik shakl-e-insānī meñ hai

raushnī ke safīne bulāte raheñ
sāhil-e-shab se ho kar guzar jā.ūñgā