Tags-Shaam

tere ehsās kī tan pe chādar liye tere hamrāh raqsāñ meñ aise rahūñ
pyaar kī mujh pe badlī barastī rahe din nikaltā rahe shaam Dhaltī rahe

na latīf shaam kī justujū na hasīñ sahar kī talāsh hai
jo nazar nazar ko navāz de mujhe us nazar kī talāsh hai

aur imroz kā ā.īna ye kahtā hai ki dekh
ādmī-zāde tirī umar kī shaam aa pahuñchī

e.ajāz maiñ ne raj.at-e-ḳhurshīd kā kiyā
bālā-e-bām us ko sar-e-shām le gayā

duniyā se dāġh-e-zulf-e-siyah-fām le gayā
maiñ gor meñ charāġh sar-e-shām le gayā

nafrat huī do-rañgī-e-lail-o-nahār se
maiñ sub.h-o-shām us ko lab-e-bām le gayā

jugnū jale bujhe mirī palkoñ pe sub.h tak
jab bhī tirā ḳhayāl sar-e-shām aa gayā

shaam tak un kā nishāñ bhī na rahā
sub.h jo mahv-e-tag-o-tāz hue

shaam ke ba.ad añdherā nahīñ rahtā ghar meñ
ek sūraj nikal aatā hai sahar se pahle

phir aaj 'adam' shaam se ġhamgīñ hai tabī.at
phir aaj sar-e-shām maiñ kuchh soch rahā huuñ

had idrāk se aage thī tire qurb kī shaam
DhūñDne tujh ko kahāñ chāñd-sitāre jaate

din guzrā aur shaam Dhalī phir vahshat le kar aa.ī raat
jab bhī us kā hijr manāyā ham ne vo kahlā.ī raat

sham.a har shaam tere rone par
sub.h-dam tak charāġh hañstā hai

vaqt hai ab namāz-e-maġhrib kā
chāñd ruḳh lab shafaq hai gesū shaam

ek ummīd mulāqāt meñ likkhī sar-e-shām
aur phir āḳhir-e-shab ek ġhazal aur kahī

vo sub.h-e-rihā.ī thī yā shām-e-asīrī thī
jab maiñ dar-e-zindāñ se zanjīr uThā laayā

vahī va.ada hai vahī aarzū vahī apnī umr-e-tamām hai
vahī chashm hai vahī raah hai vahī sub.h hai vahī shaam hai

ye vaqt-e-shām hai yā rab dil o nazar kī ho ḳhair
ki is samay meñ to saa.e bhī Dhalte rahte haiñ

muntazir us ke dilā tā-ba-kujā baiThnā
shaam huī ab chalo sub.h phir aa baiThnā

paañv bahut thakā chukā shaam kā qurb aa chukā
dauḌ ki vaqt jā chukā tū pas-e-kārvāñ meñ hai