Tags-Shaam

fazā-e-shām ziyā-e-sahar usī se milī
kashish hayāt ko al-muḳhtasar usī se milī

bujhtī sham.a kī sūrat kyuuñ afsurda khaḌe ho khiḌkī meñ
dekho shaam hai kis darja dilkash is dhuup kī vardī meñ

jab bhī giit suntā huuñ
shaam kī havāoñ ke

ye bhī ġhazal tamām huī shaam ho chukī
afsūn-e-shā.irī ke hunar kitnī duur haiñ

bām-e-ḳhayāl-e-yār se utre to ye khulā
ham se hamāre shām-o-sahar kitnī duur haiñ

shaam hī se thī fazā meñ kisī jalte hue kapḌe kī bisāñd
aur havā chaltī thī jaise

na.ī sub.h chāhte haiñ na.ī shaam chāhte haiñ
jo ye roz o shab badal de vo nizām chāhte haiñ

shaam ke dhuñdlakoñ meñ Dūbtā hai yuuñ sūraj
jaise aarzū koī mere dil meñ martī hai

aas ke rañgīñ patthar kab tak ġhāroñ meñ luḌhkāoge
shaam Dhale in kohsāroñ meñ apnā khoj na pāoge

gulshan-e-dahr meñ rāhat bhī hai aur rañj bhī hai
detī hai sub.h-e-vatan shām-e-ġharībāñ kī ḳhabar

aaj tak yaad hai vo shām-e-judā.ī kā samāñ
terī āvāz kī larzish tire lahje kī thakan

mah-e-nau shaam ke hote hī tasavvur meñ tire
thā khaḌā sar pe liye ḳhanjar-e-uryāñ tujh bin

der tak hasrat se dekhegī use shām-e-safar
jis zamīñ par naqsh apne chhoḌ kar guzrā huuñ maiñ

yuuñ to har shaam umīdoñ meñ guzar jaatī hai
aaj kuchh baat hai jo shaam pe ronā aayā

maiñ ne dekhā hai sar-e-shām udāsī kā ḳhirām
paañv meñ chhāle pahan ke na Thaharnā us kā

phir pukārā chāñd-tāroñ ne mujhe shām-e-firāq
phir nigāh-e-shauq nazr-e-āsmāñ hone lagī

ik maiñ hī to nahīñ huuñ pareshān-o-pur-malāl
ai shaam tere saath bhī ab ke baḌī huī

meñ ab tak din ke hañgāmoñ meñ gum thā
magar ab shaam hotī jā rahī hai

na jaane kis nagar aaj shaam ho
sahar huī to jī udaas ho gayā

ye naam aisā hai bilkul hī gar na leñ us ko
to phir bhī ham sahar-o-shām lete rahte haiñ