Tags-Shaam

shaam ko jis vaqt ḳhālī haath ghar jaatā huuñ maiñ
muskurā dete haiñ bachche aur mar jaatā huuñ maiñ

jo de ārām Tak āvārgī 'mīr'
to shām-e-ġhurbat ik sub.h-e-vatan hai

maiñ rahne vaalā shaam o sahar ke pare kā huuñ
Daalā gayā huuñ shaam o sahar ke hisāb meñ

shaam hote hī koī ḳhushbū darīcha khole
aur phir biite hue lamhe satāne lag jaa.eñ

jaane kyuuñ jaltī sulagtī shaam ke aivān meñ
phail jaatī hai tirī bātoñ kī ḳhushbū aaj bhī

husn kī sub.h ik shikast-e-jamīl
husn kī shaam kāmrānī hai

usī kī yaad hai mahtāb-e-shām-hā-e-firāq
vo ek shab ki sar-e-kū-e-mah-vashāñ guzrī

sub.h-e-pīrī shaam hone aa.ī 'mīr'
tū na chetā yaañ bahut din kam rahā

qismat kī tīrgī kī kahānī na pūchhiye
sub.h-e-vatan bhī shām-e-ġharībāñ hai aaj kal

ye ek hafte kī baat hai aur kal se munnā ye kah rahā hai
ye jānvar sub.h-o-shām be-kār boltā hai

ubhar jo aa.e sar-e-shām ātishīñ lamhe
safar meñ barf-badan der tak pighalte rahe

din bhar kisī manzar ke ta.āqub meñ bhaTaknā
aur shaam ko lafzoñ ke nagīñ rolte rahnā

kis kā chamaktā chehrā laa.eñ kis sūraj se māñgeñ dhuup
ghuur añdherā chhā jaatā hai ḳhalvat-e-dil meñ shaam hue

log hilāl-e-shām se baḌh kar pal meñ māh-e-tamām hue
ham har burj meñ ghaTte ghaTte sub.h talak gumnām hue

rāste gum ho rahe haiñ dhund kī pahnā.ī meñ
sardiyoñ kī shaam hai phir us kā chak aane ko hai

ab to is chhat par koī māh-e-shabāna chāhiye
sāya-e-qāmat fasīl-e-shām tak aane ko hai

paivast the zamīn se afa.ā shajar se tiir
juuñ hī judā maiñ shām-e-azā-dār se huā

ab shaam ho ga.ī hai to sūraj ko roiye
ham ne kahā na thā ki javānī fareb hai

gher lete the tilā.ī dā.ere
pāniyoñ meñ bahtī bahtī shaam thī

solahveñ ziine pe sūraj thā 'obaid'
january kī ik salonī shaam thī