Tags-Shaam

dil ko tire ḳhayāl se bahlā rahā huuñ maiñ
yuuñ shām-e-ġham ko sub.h kiye jā rahā huuñ maiñ

hui hai shaam phir ashkoñ se ik vazū ho 'nadīm'
phir ek raat sitāre shumārne kā amal

haq-shanāsī kā chalan ham meñ nahīñ baaqī rahā
sub.h apnī pur-alam hai pur-ḳhatar har shaam hai

gher letā hai hameñ abr tirī yādoñ kā
ham charāġhoñ kī tarah shaam se jal jaate haiñ

ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-bām aa jaa.e

palaT aatā hai har din ghar kī jānib shaam Dhalte hī
kisī be-nām bastī se guzar ke rāstā merā

kahe detā hai ḳhud āġhāz hī anjām kyā hogā
tirī ātish-bayānī se charāġh-e-shām kyā hogā

maiñ zīna-e-ḳhvāb se utar kar sahar talak aa to jā.ūñ lekin
ye shaam mujh par ayaañ na hogī ye shab mujhe rāsta na degī

maiñ ik nizām-e-kohan ke narġhe meñ saañs le kar bhī sochtā huuñ
ki sub.h kaise tulūa hogī ki shaam kis rañg meñ Dhalegī

jo rañg mujh meñ sañvar rahe the vo shaam hote hī kho ga.e haiñ
jo sham.a mere vajūd meñ jal rahī hai kis sub.h tak jalegī

shaam kī zulfeñ bikharne se ayaañ hotā hai
kitne jugnū haiñ jo kājal se bañdhe rahte haiñ

ḳhunuk havā shaam kī kahānī na.ī na.ī sī
purāne ġham phir mohabbatoñ bhar na.e na.e se

ik nazar mahfil meñ dekhā thā jise
ham to kho.e hai usī meñ shaam se

kis kī numūd ke liye shaam o sahar haiñ garm-e-sair
shāna-e-rozgār par bār-e-girāñ hai tū ki maiñ

hayāt ab shām-e-ġham kī tashbīh ḳhud banegī
tumhārī zulfoñ kā isti.āra nahīñ chalegā

hukm hai muflisī kā muflis ko
shaam se tū charāġh kar ThanDā

agar vo aayā to is baar sub.h mānūñgā
bahut dinoñ se mujhe shaam par lagāyā huā hai

girte rahte haiñ is meñ shām-o-sahar
bhartā rahtā hai ḳhāk-dān paḌā

shaam hote hī khulī saḌkoñ kī yaad aatī hai
sochtā roz huuñ maiñ ghar se nahīñ niklūñgā

muddat meñ shām-e-vasl huī hai mujhe nasīb
do-chār saal tak to ilāhī sahar na ho