Tags-Shaam

sāya-e-zulf siyah-fām kahāñ tak pahuñche
jaane ye silsila-e-shām kahāñ tak pahuñche

saarā din saath raho saa.e kī sūrat apne
shaam hote hī bahāne se alag ho jaao

phir yaad bahut aa.egī zulfoñ kī ghanī shaam
jab dhuup meñ saaya koī sar par na milegā

umr ke ġharb-e-siyah meñ kaisā Duub rahā hai mehr-e-shabāb
dekh sako to dekh lo dam-bhar 'ramz' ye shaam suhānī aur

shab-e-afsāna munavvar hai na ab shām-e-ġhazal
anjuman hai na kahīñ anjuman-ārā.ī hai

dhīre dhīre shaam kā ā.ankhoñ meñ har manzar bujhā
ik diyā raushan huā to ik diyā andar bujhā

bazm-e-dil-e-mushtāqāñ juuñ shām-e-ġharībāñ hai
yak jalva meñ tū raushan aa sham-e-sifat kar de

ab to hai par hamāre vaqtoñ meñ
shīsha-e-sub.h-o-shām thā hī nahīñ

shām-e-tanhā.ī bujhā do jhilmilātī sham.a bhī
in añdheroñ hī meñ aksar raushnī paatā huuñ maiñ

ye jo bedār bhī haiñ so.e hue bhī in meñ
shaam kis kī hai ḳhudā jaane saverā kis kā

iraq o shaam ke parde meñ be-naqāb huā
tamām dahr kā dukh ek nañge sar meñ thā

hañstī huī ga.ī hai sub.h pyaar se aa rahī hai shaam
terī shabīh ban ga.ī vaqt kī gard hū-ba-hū

ye dekho baḌhne hī vaalī hai jaise gaañv kī shaam
ye jaise uThne hī vaalā hai gaañv kā bāzār

jaane kyā kyā zulm parinde dekh ke aate haiñ
shaam Dhale peḌoñ par marsiya-ḳhvānī hotī hai

sāmne mere rahā gar shaam se le tā-sahar
husn meñ gar misl-e-māh-e-chārdah kāmil huā

shaam se pahle ghar ga.e hote
yā sar-e-shām mar ga.e hote

hikāyat-e-gul-o-bulbul pe ḳhanda-zan haiñ vahī
jo shām-e-hijr na sub.h-e-visāl se guzre

phailtī hai shaam dekho Dūbtā hai din ajab
āsmāñ par rañg dekho ho gayā kaisā ġhazab

marqad sā banā hai ḳhushbū kā muñh band kalī ke siine meñ
ai shām-e-gulistāñ tū hī batā ye bhī to kisī kā raaz nahīñ

hamrāh tire phuul khilātī thī jo dil meñ
ab shaam vahī dard se ḳhālī nahīñ jaatī