Tags-Sharm

maiñ tamāshā huuñ tamāshā.ī haiñ chāroñ jānib
sharm hai sharm ke maare nahīñ ro saktā maiñ

sharm ai nāla-e-dil ḳhāna-e-aġhyār meñ bhī
josh-e-afġhān-e-azā-bār kī afvāheñ haiñ

sharm kyā hai mujhe jo kahnā ho
sāmne sab ke barmalā kahiye

tabī.atoñ meñ baḌā iḳhtilāf hotā hai
mujhe to arz-e-tamannā pe sharm sī aa.ī

un ko sharm-o-hayā nahīñ aatī
dil churā kar nazar churāte haiñ

aañkh uThne lagī terī aur sharm zarā kam ho
shīshe meñ dikhā dūñgā phir tujh ko parī-ḳhāna

sharm mat kījiye le liije sahārā merā
maat ham ne bhī bahut aap se khaa.ī huī hai

huuñ kushta-e-teġh-e-sharm-e-jānāñ
har zaḳhm kā be-zabāñ dhan hai

chaman meñ jab bhī tire pairahan kī bū aa.ī
bahār bhiig ga.ī sharm se pasīne meñ

liyā jab naam ulfat kā badal jaatī hai sīrat bhī
nigāh-e-sharm-āgīñ meñ sharārat aa hī jaatī hai

zindagī tujh ko magar sharm nahīñ aatī kyā
kaisī kaisī tirī tasvīr nikal aa.ī hai

fajar uTh ḳhvāb siiñ gulshan meñ jab tum ne malī añkhiyāñ
ga.iiñ muñd sharm suuñ nargis kī pyāre juuñ kalī añkhiyāñ

vaañ us ko haul-e-dil hai to yaañ maiñ huuñ sharm-sār
ya.anī ye merī aah kī tāsīr se na ho

vaañ vo to ghar se apne pī kar sharāb niklā
yaañ sharm se araq meñ Duub āftāb niklā

sharm aa.ī bhī jo us shoḳh kī āñkhoñ meñ kabhī
shoḳhiyāñ kartī huī saath sharārat aa.ī

the us ke haath lahū meñ hamāre ġharq magar
zarā bhī sharm na aa.ī use mukarte hue

dur-e-dandāñ hue the maujzan kis bahr-e-ḳhūbī ke
ki motī sharm se paanī hue silk-e-la.ālī meñ

sharm se mar jāoge insān haiñ gar aap ik
kis tarah karte haiñ ye muflis guzar mat dekhiye

parsoñ maiñ bāzār gayā thā darpan lene kī ḳhātir
kyā bolūñ dūkān pe hī maiñ sharm ke maare gaḌ baiThā

arz-e-matlab pe mere ai 'nayyar'
nigah-e-sharm-sār kā aalam