Tags-Subah

ab kaun sī matā-e-safar dil ke paas hai
ik raushani-e-sub.h thī vo bhī udaas hai

sub.h kī manzil kā tāroñ se patā kyā pūchhnā
zulmat-e-shab kārvāñ-dar-kārvāñ paatā huuñ maiñ

mujh ko le jā.egī manzil pe mirī sub.h-e-yaqīñ
laakh raste meñ mujhe shaam huī jaatī hai

sub.h ke ubharne se shaam ke utarne tak
kitnī jān-levā hai dopahar kī ḳhāmoshī

mirī shām-e-alam sub.h-e-masarrat hotī jaatī hai
ki har lahza tire milne kī sūrat hotī jaatī hai

sub.h zindāñ meñ bhī hotī hogī
phuul maqtal meñ bhī khilte hoñge

chāñd thā sāhil-e-nafas ke qarīb ek din mere dil meñ Duub gayā
sub.h kā raaz rā.egāñ Thahrā shaam bhī ghul ga.ī tamāshe meñ

ghire haiñ dard-o-alam meñ firāq ke aise
ki sub.h-e-īd bhī yaañ shaam hai mahram kī

dekhte dekhte jab maut sitāre kī huī
phir koī sub.h kahāñ ḳhvāb ke maare kī huī

jo saath sub.h se chale vo saare log din Dhale
usī taraf ko ho liye jidhar charāġh jal ga.e

maanā ki baḌī saffāk hai tū bil-farz baḌī jallād hai tū
maiñ jiitā rahā tā-sub.h agar to ai shab-e-hijrāñ kuchh na kiyā

us nazar ke uThne meñ us nazar ke jhukne meñ
naġhma-e-sahr bhī hai āh-e-sub.h-gāhī bhī

sāvan sho.ale bhaḌke gulshan gulshan aag lagī
kaisā sūraj ubhrā jis ne sub.h ko ātish-nām kiyā

ab to hai par hamāre vaqtoñ meñ
shīsha-e-sub.h-o-shām thā hī nahīñ

hañstī huī ga.ī hai sub.h pyaar se aa rahī hai shaam
terī shabīh ban ga.ī vaqt kī gard hū-ba-hū

raat bhar tajraba-e-ḳhūn-e-jigar ham ne kiyā
sub.h-dam dasht ko gulzār banā kar uTThe

ik sub.h hai jo huī nahīñ hai
ik raat hai jo kaTī nahīñ hai

āñkhoñ meñ merī sub.h-e-qayāmat ga.ī jhamak
siine se us parī ke jo parda ulaT gayā

ye kyā ki sub.h hote hī behosh ho ga.e
shab zinda-dār ho to sadā jāgte raho

sub.h-e-shab-e-visāl hai ā.īna haath meñ
sharmā ke kah rahe haiñ ki chehra utar gayā