Tags-Subah

ai shab-e-hijr ab mujhe sub.h-e-visāl chāhiye
taaza ġhazal ke vāste taaza ḳhayāl chāhiye

shab ko shaitān bhī māñge hai panāheñ jis se
sub.h vo sāhib-e-īmān huā phirtā hai

hikāyat-e-gul-o-bulbul pe ḳhanda-zan haiñ vahī
jo shām-e-hijr na sub.h-e-visāl se guzre

darkār hai shaguftan-e-gul-hā-e-aish ko
sub.h-e-bahār pumba-e-mīnā kaheñ jise

māthā ghisne se mire mahr-jabīñ ke dar par
sub.h kī ujlī peshānī hai kaho yā na kaho

har sub.h uTh butoñ se mujhe raam raam hai
zāhid tirī namāz ko merā salām hai

din ko na bhuuk hai na mujhe raat ko hai niiñd
is rozgār meñ ye mirī sub.h o shaam hai

nikāle the do chāñd us ne muqābil
vo shab sub.h-e-jannat kā jis par gumāñ thā

vo ḳhud pilā.eñ maiñ na piyūñ merī kyā majāl
is meñ savāl-e-sub.h hai kyā zikr-e-shām kyā

go tire shahr meñ bhī raat rahe
sub.h tak tishna-e-hayāt rahe

sub.h-e-sādiq meñ bahut der nahīñ hai lekin
kahīñ ujlat meñ charāġhoñ ko bujhā mat denā

sub.h ke naam se ghabrātā huuñ
jī ko raas aayā añdherā kyuuñ thā

subah se raat tak ghar meñ baTī hai
zarā sā chheḌ do to hañs paḌī hai

sub.h-e-chaman meñ ek yahī āftāb thā
is aadmī kī laash ko e.azāz se uThā

ghar se nikal aatā huuñ aksar subah ke taḌke vahshat meñ
jhiil meñ patthar pheñk ke din-bhar vaqt-guzārī kartā huuñ

sub.h talak aflāk pe ik kaifiyyat taarī kartā huuñ
chāñd ko apnī nazm sunā kar shab-bedārī kartā huuñ

maiñ shab nizhādoñ meñ sub.h-e-fardā kī aarzū huuñ
maiñ apne imkāñ meñ raushnī huuñ sabā nahīñ huuñ

har ik shab har ghaḌī guzre qayāmat yuuñ to hotā hai
magar har sub.h ho roz-e-jazā aise nahīñ hotā

tum vaqt-e-sahar rauzan-e-dīvār meñ dekho
laalī sī kahīñ sub.h ke āsār meñ dekho