Tags-Sukoon

dimāġh-o-zehn meñ ik jañg barpā hai ḳhayāloñ kī
ise hamvār kar ke ik sukūn-e-jāvedāñ de de

ye sukūn-e-jāñ kī ghaḌī Dhale to charāġh-e-dil hī na bujh chale
vo balā se ho ġham-e-ishq yā ġham-e-rozgār koī to ho

aa ki vaqt-e-sukūn-e-marg aayā
naala nā-ḳhush-gavār thā na rahā

kabhī to ham haiñ yahāñ vahāñ ke kabhī tasavvur idhar udhar kā
sukūn-o-rāhat se kyā ta.alluq ki bad-gumānī hai aur ham haiñ

ġhazab huā ki muqaddar mujhe vahāñ laayā
jahāñ sukūn bhī nāpaid lutf bhī mafqūd

sukūn-e-mustaqil dil be-tamannā shaiḳh kī sohbat
ye jannat hai to is jannat se dozaḳh kyā burā hogā

hai ab to ek jaal sukūn-e-hameshgī
parvāz kā to zikr hī kyā par bhī kuchh nahīñ

jo dekho ġhaur se kuchh kam nahīñ hai ye bhī 'tūr'
ik iztirār sukūn-e-havā meñ rakkhā hai

rāteñ mujh meñ sukūn kitnā hai
ham ne dekhā ye bandagī kar ke

mujhe yaqīñ hai nasīb merā na saath degā ki tajraba hai
sukūn ko iztirāb kahnā haqīqatoñ ko sarāb likhnā

yaqīn kaise karūñ maiñ 'bāno'
sukūn kyā de sakeñ dilāse

thī har taḌap sukūn kī duniyā liye hue
pahlū meñ aap the ki dil-e-nā-subūr thā

sukūn-e-dil na mayassar huā zamāne meñ
na yaad rakhne meñ tum ko na bhuul jaane meñ

girā na aañkh se aañsū fareb-e-qismat par
sukūn jis se ho vo iztirāb paidā kar

bechain zindagī ke taqāze ajiib haiñ
phir us jagah chaleñ jahāñ kho aa.e haiñ sukūn

ābādiyoñ meñ kho gayā sahrāoñ kā junūn
shahroñ kā jamghaToñ meñ gayā gaañv kā sukūn

ābād kar ḳharābae--zehn-o-ḳhayāl ko
shahroñ meñ DhūñDhtā hai sukūn-o-qarār kyā

sirf vaqtī sukūn miltā hai
pyaas bujhtī nahīñ hai paanī se

so.e hue haiñ log to hoñge sukūn se
ham jāgne kā rog lagā.eñ kisī ko kyā

sukūn-e-qalb o shakeb-e-nazar kī baat karo
guzar ga.ī hai shab-e-ġham sahar kī baat karo