Tags-Sukoon

bas ik sukūn hī ham ko na mil sakā tā-umr
vagarna tere tasadduq meñ ham ko kyā na milā

ma.aal ham ne jo dekhā sukūn o jumbish kā
to kuchh samajh ke taḌapnā hī iḳhtiyār kiyā

har ehtimām hai do din kī zindagī ke liye
sukūn-e-qalb nahīñ phir bhī aadmī ke liye

hamesha pur-sukūn rahne vaalī
mālāzībatabām

suqūt-e-nabz ḳhabar hai sukūn-e-ḳhātir kī
ab aa chalā hai ab aa jā.egā qarār mujhe

ye zindagī koī mahshar sahī magar yaaro
sukūn-baḳhsh hai ham ko yahī qayāmat bhī

sukūn-e-rūh milā halqa-e-rasan meñ mujhe
vagarna bār-e-garāñ thā badan pe sar merā

sukūn-e-dil meñ ġham-o-iztirāb chāhte haiñ
ham aise log bhī kyā inqalāb chāhte haiñ

suhānā ḳhvāb āñkhoñ ko dikhā kar
sukūn-e-qalb luuTā jā rahā hai

tire jamāl se mahfil meñ ab sukūn sā hai
vagarna zehn kisī kā kisī se saaf na thā

sukūn tere tasavvur se jis ko miltā hai
vo terī diid ko lekin taḌap rahā hai abhī

mire suune ujḌe dayār meñ kabhī do ghaḌī hī qayām kar
ho jo dil to us meñ sukūn le tirā jī kare to ḳhirām kar

sar-e-anjuman ġhanīmat hai butoñ kī kam-nigāhī
ki sukūn-e-dil pe aatī hai nazar se bhī tabāhī

sukūn-e-ahl-e-ḳharābāt-e-ishq kyā kahiye
rukī rukī sī yahāñ umr-e-tez-gām bhī hai

tujh se bhāge sukūn se bhāge
sar-garāñ haiñ ki dil-girafta nahīñ

jo dil ko pahle mayassar thā kyā huā us kā
jo is sukūn se behtar thā kyā huā us kā

isī ummīd meñ betābi-e-jāñ baḌhtī jaatī hai
sukūn-e-dil jahāñ mumkin ho shāyad vo maqām aa.e

ḳhud sukūn-e-āgahī ne ruuh ko taskīn dī
ham bichhaḌ kar jab ġhubār-e-kārvāñ tak aa ga.e

hālāñki iztirāb hai zāhir sukūn se
kyā kiije us kā lahja dil-āvez ab bhī hai

sukūn-e-dil kā maqām pūchho vafā kī manzil ke rāhiyoñ se
kaThin hai har din masāfatoñ kā ye ratjagoñ kā azaab kaisā