Tags-Sukoon

yuuñ taras khā ke na pūchho ahvāl
tiir siine pe lagā ho jaise

kisī mahal meñ na shāhoñ kī ān-bān meñ hai
sukūn jo kisī Dhābe ke sā.ebān meñ hai

bad-nasībī sukūn se so.e
jab savere azaan hotī hai

sukūn-e-dil meñ vo ban ke jab intishār utrā to maiñ ne dekhā
na dekhtā par lahū meñ vo baar baar utrā to maiñ ne dekhā

kisī ke ishq meñ ye hāl-e-zār rahtā hai
sukūn pā ke bhī dil be-qarār rahtā hai

ġham-e-hayāt ġham-e-rozgār be-vatanī
sukūn se jo Dhale kaash aisī shaam to aa.e

mire jahān-e-mohabbat meñ paḌ ga.ī halchal
sukūn-e-dil ne mujhe aur be-qarār kiyā

dabīcha-e-fanā hai haqīqat meñ zindagī
ya.anī sukūn-e-hosh hai marnā kaheñ jise

qayām ruuh meñ kar dhyān se utar ke na jā
sukūn baḳhsh mujhe yuuñ tabāh kar ke na jā

jo khel jānte haiñ un ke aur haiñ andāz
baḌe sukūn baḌī sādgī se khelte haiñ

ye sach nahīñ ki tamāzat se Dar ga.ī hai nadī
sukūn-e-dil ke liye apne ghar ga.ī hai nadī

dīvāne dasht meñ bhī nasīb aazmā chuke
vaañ bhī sukūn-e-qalb kā sāmāñ koī na thā

gulshan meñ le ke chal kisī sahrā meñ le ke chal
ai dil magar sukūn kī duniyā meñ le ke chal

tū sukūn-o-sabr miTā.e jā ġham-e-ishq mujh ko rulā.e jā
ho taḌap taḌap ke sahar mujhe yahī dard-e-dil tirā kaam hai

duur bastī se gayā ke ik shajar kī chhāñv meñ
tum ko bil-āḳhir sukūn-e-jāvedānī mil gayā

ajab inqalāb kā daur hai ki har ek samt fishār hai
na kahīñ ḳhirad ko sukūn hai na kahīñ junūñ ko qarār hai

aap se mil kar mile dil ko sukūn
aap kī maujūdgī kyā ḳhuub hai

ishq ke marāhil meñ vo bhī vaqt aatā hai
āfateñ barastī haiñ dil sukūn paatā hai

yaad meñ terī pā liyā maiñ ne sukūn-e-zindagī
ab tirī yaad meñ mujhe chain kyā qarār kyā

kise ḳhabar ki ahl-e-ġham sukūn kī talāsh meñ
sharāb kī taraf ga.e sharāb ke liye nahīñ