Tags-Sukoon

jahāñ meñ kis tarah mujh ko sukūn-e-qalb hāsil ho
banī hai zindagī hī jab sarāpā imtihāñ merī

pūchhiye mat kyā sukūn-e-mustaqil thā qabr meñ
muddatoñ ke ba.ad aisī niiñd meñ soyā thā maiñ

ik pal ko bhī sukūn se jiinā muhāl hai
kin dushmanān-e-jāñ kī nigahbāniyoñ meñ huuñ

chale ga.e ho sukūn-o-qarār-e-jāñ le kar
ham apne dard ko jaa.eñ kahāñ kahāñ le kar

yahī haal hai ka.ī saal se na qarār-e-dil na sukūn-e-jāñ
kabhī saañs ġham kī ulaT ga.ī kabhī rishta dard se kaT gayā

na dayār-e-dard meñ chain hai na sukūn dasht-e-ḳhayāl meñ
kabhī lamha bhar ko dhuāñ chhaTā to ġhubār raah meñ aT gayā

sirf vaqtī sukūn miltā hai
pyaas bujhtī nahīñ hai paanī se

hai pur-sukūn samundar magar suno to sahī
lab-e-ḳhamosh se kahte haiñ bādbāñ kyā kyā

āḳhir taḌap taḌap ke ye ḳhāmosh ho gayā
dil ko sukūn mil hī gayā iztirāb meñ

sukūn kitnā hai jī ko ye soch kar ki hameñ
haram se koī ilāqa na ab shivāle se

is vādī-e-sukūn-o-musarrat ke bāvajūd
ye rañj ye malāl tumheñ kaun de gayā

jo Dūbnā hai to itne sukūn se Duubo
ki ās-pās kī lahroñ ko bhī patā na lage

sukūn-e-qalb hāsil hai pareshāñ maiñ nahīñ dilbar
jo tum se duur hotā hai vahī nā-sāz hotā hai

ye māyūsī kahīñ vaj.h-e-sukūn-e-dil na ban jaa.e
ġham-e-be-hāsilī hī ishq kā hāsil na ban jaa.e

ik nashāt-ārā.ī ik sukūn-e-tanhā.ī
hijr yā visāl achchhā hal kare ye uljhan kaun

sukūn-e-shauq ho yā iztirāb-e-shauq 'ravish'
agar ba-manzila-e-jāñ nahīñ to kuchh bhī nahīñ

sukūn vasl meñ itnā nasīb ho ki na ho
jis iztirāb se maiñ intizār kartā huuñ

mahtāb par nahīñ hai havā bhī sukūn bhī
sannāTā dil meñ bharne ko ham kyoñ udhar ga.e

sukūn-e-qalb kī ḳhātir shab-e-furqat maiñ chūmūñgā
banā lene do tasvīr-e-lab-o-abrū zarā Thahro

sunā hai terī mahfil meñ sukūn-e-dil bhī miltā hai
magar ham jab tirī mahfil se aa.e be-qarār aa.e