Tags-Sukoon

sukūn-e-tūl-e-vafā hai talab kī kotāhī
ki lams-e-yād dhaḌaktī jasārateñ māñge

sukūn ke vo sabhī pal to le gayā hai magar
mire vajūd meñ apnī thakān chhoḌ gayā

sukūn-e-kā.enāt-e-dil baqā hai
ajal ik jumbish-e-parvāz-e-hastī

har ek shahar meñ thā iztirāb kā aaseb
jahāñ sukūn ho aisā nagar koī bhī na thā

ajiib saa.e sukūnat kiye hue the yahāñ
baḌā sukūn milā hai ye ghar jalāne meñ

sukūn-e-ḳhvāb-e-fazā ranj-e-rā.egānī-e-umr
zayān-e-bā.is-e-sad-hā ziyāñ to kuchh bhī nahīñ

yahāñ tak dil ko aadat ho ga.ī hai be-qarārī kī
sukūn-e-zindagī meñ bhī taḌapnā kam nahīñ hotā

koī tamannā nahīñ hai mujh ko
sukūn-e-dil kī hī aarzū hai

ghaḌiyāñ Duboīñ kis ne sar-e-shām phir yahāñ
do pal sukūn ke jo thakan māñgtī rahī

'talḳh' maiñ is kā aaj tak DhūñD nahīñ sakā javāz
dil ko ye kyā sukūn hai aur ye kyā malāl hai

sukūn-e-dil bhī milā ābloñ kī lazzat bhī
tumhāre saath safar meñ jo ham-safar thā maiñ

sukūn-o-chain mil jaa.e ḳhudā bhī yaar ho jaa.e
agar insān meñ insāniyat bedār ho jaa.e

huuñ muztarib magar tirī sūrat nazar meñ hai
pahlū bhī ik sukūn kā dard-e-jigar meñ hai

sukūn-e-qalb to kiyā hai qarār-e-jāñ bhī luTā
tumhārī yaad bhī aa.ī to rāhzan kī tarah

sukūn qalb ko jis se mil jaa.e 'tābāñ'
ġhazal koī aisī sunā dījiyegā

baḌī dil-shikan hai rah-e-safar koī ham-safar hai na yaar hai
ki javāñ-asar hai tamām shai na sukūn hai na qarār hai

sukūn-e-dil jahān-e-besh-o-kam meñ DhūñDne vaale
yahāñ har chiiz miltī hai sukūn-e-dil nahīñ miltā

the dūsre bhī terī mohabbat ke ās-pās
dil ko magar sukūn milā kam bahut hī kam

hai bā.is-e-sukūn suḳhan-var tumhārā naam
letā hai is liye vo barābar tumhārā naam

tujh bin rah-e-hayāt meñ lutf-e-safar kahāñ
taskīn-e-qalb-o-rūh sukūn-e-jigar kahāñ