Tags-Tasawwur

jab kabhī ālam-e-tasavvur meñ
vo hasīñ aañkh muskurātī hai

ushshāq jo tasavvur-e-barzaḳh ke ho ga.e
aatī hai dam-ba-dam ye unhīñ ko sadā-e-qalb

merā saaya bhī nahīñ merā ujāle ke baġhair
aur ujāle kā tasavvur ḳhvāb sā rakhtā huuñ maiñ

sūrateñ aisī ki jin ke ik tasavvur se 'zahīr'
jism ke dariyā kī ik ek mauj bal khātī rahī

rāz-e-hastī meñ zamīñ saarī tasavvur niklī
āsmāñ apne taḳhayyul kā sahīfa dekhā

maiñ ne har-chand ki us kūche meñ jaanā chhoḌā
par tasavvur meñ mire us ne na aanā chhoḌā

mire tasavvur meñ itnī vus.at nahīñ ke terā badan samā.e
maiñ tujh ko sochūñ to aisā lagtā hai hāfiza ḳhatm ho gayā hai

husn-āfrīñ huā hai tasavvur jamāl kā
dil ko havā-e-gul ne gulistāñ banā diyā

maut aa.ī aur tasavvur aap kā ruḳhsat huā
jaise manzil tak koī rah-rau ko pahuñchā jaa.e hai

ġhair kī sub.h-e-daraḳhshāñ kā tasavvur kab tak
apnī kajlā.ī huī shaam kī kuchh baat karo

yahī ik mashġhala shām-o-sahar hai
tasavvur hai tirā aur chashm-e-tar hai

maiñ ik thakā huā insān aur kyā kartā
tarah tarah ke tasavvur ḳhudā se bāñdh liye

rag rag ek tasavvur ek umañg bhare
ik ḳhushbū phūloñ meñ kyā kyā rañg bhare

ḳhafā haiñ phir bhī aa kar chheḌ jaate haiñ tasavvur meñ
hamāre haal par kuchh mehrbānī ab bhī hotī hai

tasavvur par hinā bikhrī huī thī
samāñ āġhosh-e-ḳhalvat kī tarah thā

chāhiye us kā tasavvur hī se naqsha khīñchnā
dekh kar tasvīr ko tasvīr phir khīñchī to kyā

kisī kī zulf ke saude meñ raat kī hai basar
kisī ke ruḳh ke tasavvur meñ din tamām kiyā

na vo aarzū hai na justujū na koī tasavvur-e-rañg-o-bū
liye dil meñ dāġh-e-ġham-e-ḳhizāñ maiñ chaman se duur nikal ga.ī

haar ke zaḳhm kabhī jiit kī lazzat bhī kabhī
ham tasavvur meñ ka.ī khel rachā karte haiñ