Tags-Tasawwur

ek ek sitamgar ko tasavvur meñ bulā kar
shamshīr-e-zabāñ ham ne bhī kal ḳhuub ravāñ kī

tasavvur meñ haiñ jin ke jalve tumhāre
vo husn-e-do-ālam ko kam dekhte haiñ

idhar taraqqī ḳhayāl ko hai udhar taraqqī jamāl ko hai
vahāñ to madd-e-nazar hai surma yahāñ tasavvur meñ ro rahe haiñ

nazar bar-qadam hai tarīq-e-tasavvur
ram-o-shauq jaada hai sirr-o-elan kā

qafas se chhūTne kī kab havas hai
tasavvur bhī chaman kā ham ko bas hai

mere dilbar ke tasavvur ne kiyā is ko hasīñ
maiñ na samjhā ye qazā aa.ī ki vo yaar aayā

mahv yaañ tak huuñ tasavvur meñ tire az-rah-e-shauq
haath har dam tire dāmāñ kī taraf jaatā hai

huuñ tasavvur meñ safā-e-badan-e-yār ke ġharq
halqa-e-nāf huā halqa-e-girdāb mujhe

jigar ko rokūñ yā dil ko thāmūñ ilāhī kis kis ko maiñ sambhālūñ
mire tasavvur kī anjuman meñ vo aaj ban-Than ke aa rahe haiñ

vo aa rahe haiñ vo jā rahe haiñ mire tasavvur pe chhā rahe haiñ
kabhī haiñ dil meñ kabhī jigar meñ kabhī nazar meñ samā rahe haiñ

bas yahī ġhāyat-e-tasavvur hai
hijr meñ lutf-e-vasl aane lage

kyuuñ ki fursat adū se tum ko milī
jo tasavvur meñ mere aane lage

dekhnā mere tasavvur kā kamāl
ārzū-e-dil mujassam ho ga.ī

ḳhvāb ab husn-e-tasavvur ke ufuq se haiñ pare
dil ke ik jazba-e-māsūm ne dekhe the jo ḳhvāb

apne maazī ke tasavvur se hirāsāñ huuñ maiñ
apne guzre hue ayyām se nafrat hai mujhe

tasavvur is tarah aatā hai terā mahfil-e-dil meñ
mire hāthoñ meñ jaise ḳhud ba-ḳhud-paimāna aatā hai

hijr kī maTh meñ tasavvur us ġhazālī chashm kā
ishq ke bairāgiyoñ ko mirg-chhālā ho gayā

tere āġhosh meñ kyā jāniye kyā aalam ho
dil dhaḌaktā hai tasavvur se tamannā.ī kā

tumhārī chāñd sī tasvīr ke tasavvur meñ
hameñ patā hai musavvir kahāñ kahāñ bhaTke

rahtā hai kyā tasavvur din raat mujh ko us kā
āñkhoñ meñ laal sar kā phirtā hai kankhajūrā