Tags-Tasawwur

vo tasvīr aaj tak mahfūz hai chashm-e-tasavvur meñ
tire bachpan se jab aTkheliyāñ kartā shabāb aayā

vo ik badan ki jo sar-chashma-e-tasavvur ho
to pā-barahna safar meñ bhī zor ho jaa.e

chashm-e-dil par kaif hai chhāyā huā
hai tasavvur meñ koī aayā huā

kunj-e-qafas go kunj-e-qafas hai lekin ab ke bahārāñ meñ
ham ne mahaktā paayā josh-e-tasavvur-e-gul se dimāġhoñ ko

dekhūñ huuñ ba-nuqta-e-tasavvur
milne kī tire hī faal din raat

hameñ zor-e-tasavvur bhī gañvānā paḌ gayā ham
tasavvur meñ ḳhudā banñe kī koshish kar rahe the

ye rupahlī chhāñv ye ākāsh par tāroñ kā jaal
jaise suufī kā tasavvur jaise āshiq kā ḳhayāl

farsūda tasavvur ke makoḌoñ ko masal de
ulfat ko udhar pheñk kamāne ke liye aa

kis tasavvur ke raqs meñ go
tirī sadā kā vajūd mujh ko milā nahīñ hai

tasavvur meñ abrū ke jo mar gayā huuñ
pas-e-marg ka.aba mire rū-ba-rū hai

rāstoñ meñ ik nagar ābād hai
is tasavvur hī se ghar ābād hai

tasavvur ḳhāl-o-āriz kā tamāshā-e-do-ālam hai
yahāñ āñkhoñ meñ rahnā hai vahāñ dil meñ utar jaanā

ye bhī TuuTā to kahāñ jā.eñge ham
ik tasavvur hī to hai ghar āḳhirī

ab husn pe ḳhud us kā tasavvur bhī girāñ hai
pahle to girāñ ḳhvāb-e-zuleḳhā bhī nahīñ thā

sukūn tere tasavvur se jis ko miltā hai
vo terī diid ko lekin taḌap rahā hai abhī

ba-vaqt-e-sar-nigūnī hai tasavvur intizāristāñ
nigah ko ābloñ se shaġhl hai aḳhtar-shumārī kā

muḌ ke dekhoge to patthar se badal jāoge
ab tasavvur meñ na chhoḌī huī manzil laao

ab TuuT rahā hai mirī hastī kā tasavvur
is vaqt mujhe tujh se sarokār bahut hai

jiye jā rahā huuñ tujhe yaad kar ke
tasavvur kī duniyā ko ābād kar ke

maiñ bazm-e-tasavvur meñ use laa.e hue thā
jo saath na aane kī qasam khaa.e hue thā