Tags-Tauba

kisī kā zulf ko lahrā ke chalnā uf tauba
sharāb-e-nāb azal ke nashe meñ mast parī

vo mai-kash huuñ ki aatā hai jo lab par naam tauba kā
to mujh par josh meñ aa kar ghaTā kyā kyā barastī hai

shikast-e-paimāñ kā ham ko aadī kiyā hai ik mast-e-nosh-e-lab ne
ba-maslahat ham hue haiñ taa.ib ye tauba āḳhir shikastnī hai

abhī se tauba abhī se taqvā abhī se kyā fikr-e-dīn-o-uqbā
na.ī umañgeñ na.ī tarañgeñ na.ī javānī hai aur ham haiñ

sharm aatī hai dil meñ sau sau baar
tauba lab par magar nahīñ aatī

ab ek tauba pe aatī hai maġhfirat tire haath
ḳharīd kar ki nihāyat ye jins sastī hai

tirī ḳhātir se zāhid ham ne tauba aaj kī varna
ghaḌī bhar ġham ġhalat karne ko bas vo chiiz thī achchhī

zamāna fasl-e-gul kā aur āġhāz-e-shabāb apnā
abhī se tū ne tauba kī bhī ai zāhid kahī achchhī

mai se kahīñ sivā hai pas-e-tauba mai-kasho
aa jaa.e duur hī se kahīñ bū sharāb kī

shab-e-firāq kī rozāna āfateñ tauba
ye imtihān to hotā kabhī kabhī ke liye

aane de niiñd to sab so.eñ magar ai tauba
nāla-e-ishq kā is par shab-e-tanhā.ī kā

aap aur ahd-e-pur-vafā kiije
tauba tauba ḳhudā ḳhudā kiije

kar lī hai tauba is liye vaa.iz ke sāmne
ilzām-e-tishnagī mire saaqī ke sar na jaa.e

shikast-e-tauba kī taqrīb meñ jhuk jhuk ke miltī haiñ
kabhī paimāna shīsha se kabhī shīshe se paimāna

āsūda zamāne kī be-rāh-ravī tauba
vo mashq-e-sitam jab tak jaarī rahe ehsāñ hai

'beḳhud' yahī to umr hai aish o nashāt kī
dil meñ na apne tauba kī Thāneñ abhī se aap

koī samjhā rind koī muttaqī
lab pe tauba haath meñ sāġhar rahā

umīd-o-yās meñ ye roz-o-shab kī kashmakash tauba
ba-har-lamha fareb-e-gardish-e-ayyām kyā kahiye

subū par jaam par shīshe pe paimāne pe kyā guzrī
na jaane maiñ ne tauba kī to mai-ḳhāne pe kyā guzrī

pārsā.ī kī javāñ-margī na pūchh
tauba karnī thī ki badlī chhā ga.ī