Tags-Wada

tā-zīst na pūchhī baat kabhī ab aa ke uThā.ī laash mirī
kab va.ada-vafā.ī karte haiñ lo aur suno lo aur suno

jise dekho vahī kahtā hai tum 'maqsūd' ho mere
kisī se kar liyā hai maiñ ne va.ada kaun dekhe dekhegā

na jhapkī jab shab-e-va.ada palak to ham samjhe
ye koī aur balā thī ye intizār na thā

hasb-e-va.ada jo kal na aa.e tum
dil meñ lākhoñ burā.iyāñ aa.iiñ

naala ḳhilāf-e-va.ada kiyā haa.e kyā kiyā
sun le jo vo to farq paḌā e'tibār meñ

vo ham se kare hai kal kā va.ada
auroñ se vahāñ qarār hai aur

va.ada karne meñ kaisī ghabrāhaT pyāre
va.ade se ik pal meñ palTā jā saktā hai

javān lau pe na jaa, nau-damīda zau pe na jā
charāġh-e-va.ada hai, jaltā ye umr bhar koī hai

koī va.ada vafā nahīñ kartā
vo taġhāful shi.ār kyā kiije

vaañ shab-e-va.ada malī paañv meñ mehñdī us ne
yaañ kalejā koī maltā hai tamannā.ī kā

us ne va.ada kiyā hai aane kā
rañg dekho ġharīb ḳhāne kā

yūñhī va.ada par jo jhūTe to nahīñ milāte tevar
ai lo aur bhī tamāshā ye suno javāb ulTā

aayā na ek din bhī tū va.ada pe raat ko
achchhā kiyā sulūk taġhāful-shi.ār ḳhuub

is shauq-e-farāvāñ kī yārab āḳhir koī had bhī hai ki nahīñ
inkār kareñ vo yā va.ada ham rāsta dekhte rahte haiñ

va.ada be-kaif hai be-rañg hai gulzār 'habīb'
dil hai suunā sā tirī lutf-e-nazar hone tak

rābte us se sabhī toḌ ke yaad aayā hai
āḳhirī va.ada to sāmān meñ rakkhā huā hai

yaad na aane kā va.ada kar ke
vo to pahle se sivā yaad aayā

be-ḳhud the kiyā ġhair se va.ada mujhe manzūr
aayā hai agar hosh mukar kyuuñ nahīñ jaate

shab-e-va.ada fasīl-e-hijr se aage chamaktā hai tirā ism-e-sitāra-jū
ki jaise koī paivand-e-ridā-e-sub.h aa jaa.e kisī qindīl kī zad meñ

ai dost dard-e-dil kā mudāvā kiyā na jaa.e
va.ada agar kiyā hai to iifā kiyā na jaa.e