Tags-Wafa

kisī tarah jo na us but ne e'tibār kiyā
mirī vafā ne mujhe ḳhuub sharmsār kiyā

pūchhā thā bevafā to na paayā raqīb ko
maiñ ne bhī kis maze se kahā hai ki jī nahīñ

lailā ne ḳhud qarār diyā hai vafā ko jurm
majnūñ ne vo kitāb-e-mohabbat paḌhī nahīñ

aa ki tujh ko sāhib-e-mahr-o-vafā karte haiñ ham
le ḳhud apnī jumbish-e-mizhgāñ atā karte haiñ ham

hamāre kaan lafz-e-bevafā sun hī nahīñ sakte
ye ḳhil.at to udū ke vāste sarkār rahne deñ

mire dam tak vafā o ishq bhī duniyā meñ baaqī haiñ
masīhā.ī yahī hai vo mujhe bīmār rahne deñ

zindagī terī bahār chamanistān-e-vafā
aabrū tere liye qaum se paimān-e-vafā

auj-e-himmat pe rahā terī vafā kā ḳhurshed
maut ke ḳhauf pe ġhālib rahī ḳhidmat kī umed

āshiq-e-nām-e-vatan kushta-e-armān-e-vafā
mard-e-maidān-e-vafā jism-e-vafā jān-e-vafā

ye maut na thī qudrat ne tire sar par rakkhā ik tāj-e-hayāt
thī ziist tirī merāj-e-vafā aur maut tirī merāj-e-hayāt

kis ko ma.alūm thī is gulshan-e-aḳhlāq kī raah
maiñ ne phūloñ ko kiyā rañg-e-vafā se āgāh

pattī pattī se huā rañg-e-vafā kā iz.hār
naujavānān-e-chaman ban ga.e tasvīr-e-bahār

qaum ke dard se huuñ soz-e-vafā kī tasvīr
merī rag rag se hai paidā tap-e-ġham kī tāsīr

shahr-e-dil ke bā-vafā jab kho ga.e
āḳhirash ik be-vafā baaqī rahā

ai zan-e-nāpāk fitrat-e-paikar-e-makr-o-riyā
dushman-e-mehr-o-vafā ġhārat-gar-e-sharm-o-hayā

ab jafā se bhī haiñ mahrūm ham allāh allāh
is qadar dushman-e-arbāb-e-vafā ho jaanā

dushman harīf-e-rāh-e-vafā hai ḳhudā kī shaañ
vahāñ jis pe thā yaqīn mujhe us kā gumāñ na thā

kaisī hayā kahāñ kī vafā pās-e-ḳhalq kyā
haañ ye sahī ki aap ko aanā yahāñ na thā

qalandarān-e-vafā kī asaas to dekho
tumhāre saath hai kaun ās-pās to dekho

rañg-e-vafā uḌā dil-e-saḳht-e-raqīb se
botal meñ ye sharāb na Thahrī ubal ga.ī