Tags-Wafa

bevafā to vo ḳhair thā 'amjad'
lekin us meñ kahīñ vafā bhī thī

ahd-e-vafā subuk-havā rañg-e-vafā ke saath saath
rūh-e-suḳhan badal ga.ī tarz-e-adā ke saath saath

dostī kaisī vafā kaisī takalluf bartaraf
aap kuchh bhī hoñ magar kyā dūsrā kuchh bhī nahīñ

vafā to ḳhaak karegā mirā udū tum se
vafā ke naam kī miTTī ḳharāb kar degā

ham ġhanīmat usī ko samjheñge
lo vafā vāda-e-jafā kiije

is shahr meñ ham jurm-e-mohabbat ke liye aa.e
aur dasht meñ taqsīr-e-vafā le ga.ī ham ko

aa gayā ai sunñe vaale ab mujhe pās-e-vafā
ab bayāñ rūdād-e-dil merī zabānī ho chukī

ham ahl-e-vafā terī jafāoñ pe jo chup haiñ
jī leñge to apne hī se fariyād kareñge

bustān-e-vafā dahr meñ ābād hai ham se
din-rāt zamāne ko ḳhudā yaad hai ham se

mire nāḳhun-e-vafā par koī qarz rah na jaa.e
tire dil meñ jo girah hai use nīm-bāz rakhnā

zindagī ko ham vafā tak vo jafā tak le ga.e
apne apne fan ko donoñ intihā tak le ga.e

ye bhī mumkin hai koī aa.e sar-e-rāh-e-vafā
ye bhī mumkin hai mire ba.ad ye vīrāñ hī rahe

ḳhushbū vahī hai rañg vahī hai aaj vafā ke phūloñ kā
aap kyā aa.e phir se chaman meñ din vo purāne lagte haiñ

ab na vo zauq-e-vafā hai na mizāj-e-ġham hai
hū-ba-hū garche koī terī misāl aayā thā

vafā kī raah ko is taur se kiyā raushan
ki yaad aa.egī duniyā ko āshiqī merī

zaḳhm kaho yā khiltī kaliyāñ haath magar guldasta hai
bāġh-e-vafā se ham ne chune haiñ phuul bahut aur ḳhaar bahut

merī vafā hī mere liye qahr ban ga.ī
apnī vafā pe un ko nadāmat hai āj-kal

amiir laakh idhar se udhar zamāna huā
vo but vafā pe na aayā maiñ be-vafā na huā

gulshan-e-dahr meñ kuchh bū-e-vafā baaqī hai
ki ḳhizāñ meñ bhī sabā sū-e-chaman aatī rahī

rah-e-vafā meñ unhīñ kī ḳhushī kī baat karo
vo zindagī haiñ to phir zindagī kī baat karo