Tags-Wafa

na mudārāt hamārī na adū se nafrat
na vafā hī tumheñ aa.ī na jafā hī aa.ī

tumhāre ḳhūgar-e-bedād ko kyā lutf kī hājat
vafā aisī na karnā tum jo āḳhir ko jafā nikle

ham bhī parvāna-mizājī kā dikhā.eñ aalam
qīmat-o-qadr-e-vafā kuchh hameñ ma.alūm to ho

dil se havā-e-kisht-e-vafā miT ga.ī ki vaañ
hāsil sivā.e hasrat-e-hāsil nahīñ rahā

vafā kā zikr chalāyā to hañs ke bole vo
fuzūl kaam hamāre yahāñ nahīñ hote

vo bevafā koī dam aur jo Thahar jaatā
rah-e-talab meñ ye dil yuuñ na dar-ba-dar jaatā

ġharaz ke bande haiñ ahl-e-ālam nahīñ koī bā-vafā jahāñ meñ
na kījiye faisla abhī ye 'nasīr' ke imtihāñ se pahle

dil le gayā hameñ phir usī bevafā ke paas
jaanā nahīñ thā ham ko jahāñ ham magar ga.e

vo kyuuñ na rūThtā maiñ ne bhī to ḳhatā kī thī
bahut ḳhayāl rakhā thā bahut vafā kī thī

va.ade vafā kiye na kabhī tum ne jān-e-jāñ
dil phir bhī chāhtā hai ki va.ada nayā karo

hai ye banda hī bevafā sāhab
ġhair aur tum bhale bhalā sāhab

jaane kyā soch ke ham tujh se vafā karte haiñ
qarz hai pichhle janm kā so adā karte haiñ

ho chukī bū-e-vafā shahr se ruḳhsat kab kī
koī din hai ki phaloñ meñ se bhī ras jaatā hai

raah tashkīl vo arbāb-e-vafā ne kī thī
ab jahāñ qāfila-e-ahl-e-havas jaatā hai

ik bevafā kā naam likhoge kahāñ talak
aurāq apne maazī ke saade bhī chhoḌ do

maqām-e-parvarish-e-āh-o-lāla hai ye chaman
na sair-e-gul ke liye hai na āshiyāñ ke liye

vo jo likkhā thā kabhī ḳhūn-e-jigar se maiñ ne
miTtā jaatā hai vahī naqsh-e-vafā mere ba.ad

bāñdh kar ahd-e-vafā koī gayā hai mujh se
ai mirī umr-e-ravāñ aur zarā āhista

us ne ahbāb se pūchhā hai mire ghar kā pata
yaad aayā use paimān-e-vafā mere ba.ad

tamām shahr hī dushman hai kyā kiyā jaa.e
vafā ke naam se bad-zan hai kyā kiyā jaa.e