Tags-Wafa

rah-e-vafā meñ unhīñ kī ḳhushī kī baat karo
vo zindagī haiñ to phir zindagī kī baat karo

vo mujhe mashvara-e-tark-e-vafā dete the
ye mohabbat kī adā hai mujhe ma.alūm na thā

vafā ke tazkire ham ne bahut sune 'ḳhālid'
magar jahāñ meñ koī ham ko bā-vafā na milā

ḳhulūs ko jo ḳhushāmadoñ meñ shumār kar leñ
tum aise logoñ ko tohfatan bhī vafā na denā

vo zindagī jo mash.al-e-vafā kī ham-rikāb thī
guzar ga.ī hañsī-ḳhushī charāġh ke baġhair bhī

mujhe raas aa.eñ ḳhudā kare yahī ishtibāh kī sā.ateñ
unheñ aitabār-e-vafā to hai mujhe aitabār-e-sitam nahīñ

jafā kī dhuup meñ guzrī hai zindagī saarī
vafā ke naam pe jheleñge ġham to kyā hogā

naġhme bhī haiñ pasand mujhe soz bhī aziiz
sarmāya-e-vafā hai mirī zindagī kā saaz

bevafā tum hue kī tark-e-mohabbat maiñ ne
ishq-bāzī mirā sheva thā mirī zaat na thī

ḳhudā nahīñ to magar umr bhar mohabbat meñ
tire huzūr jabīn-e-vafā jhukī hī rahī

rahe kyuuñ na siine meñ dam ḳhafā ye nayā sitam hai na.ī jafā
kahūñ kyā safī' koī bevafā mire dil ko le kar mukar gayā

TuuTā to aziiz aur huā ahl-e-vafā ko
dil bhī kahīñ us shoḳh kā paimāñ to nahīñ hai

dūsrī rāh-e-vafā meñ koī manzil hī na thī
jo tirī bazm se uTThe vo sar-e-dār aa.e

kyā kyā jafā.eñ kī haiñ har ik aarzū ke saath
aur is tarah ki un pe vafā kā gumāñ rahe

ġham-e-āshiqī ho tirā bhalā tujhe yaad rakkhūñgā maiñ sadā
isī ek nām-e-vafā pe bas mujhe baar baar chhalā gayā

sunā hai dil bhī nagar thā rasā basā bhī thā
jalā to aañch bhī ahl-e-vafā nahīñ aa.ī

maiñ us ko DhūñDhtā phirtā huuñ har sū
jo mujh se kah sake maiñ bevafā huuñ

terī manzil hai ġhubār-e-rah-arbāb-e-vafā
rahrav-e-rāh-e-talab qāfila-sālār na ban

tārik-e-rasm-e-vafā aur gunahgār na ban
mahram-e-ishq hai to mahram-e-asrār na ban

vafā kī raah meñ nikle to rāhdāñ kī tarah
tire jamāl kā partav bhī ham-safar Thahrā