Tags-Yaad

nigāh-e-mast-e-sāqī bāda-ḳhvāroñ se ye kahtī hai
butoñ kī jab nazar se gir paḌo yād-e-ḳhudā karnā

yād-e-māzī meñ umr kaT jaa.e
ḳhaak hai māh-o-sāl meñ ai dost

vo jin ko apne tark-e-ta.alluq pe naaz thā
aaj un ko yaad sohbat-e-yārāñ bhī aa.egī

hazrat aadam pe jo guzrī hai sab ko yaad hai
dāna-e-gandum kī zinda aaj tak be-dād hai

'kaif' pardes meñ mat yaad karo apnā makāñ
ab ke bārish ne use toḌ girāyā hogā

tumhāre naam ko likkhā hai paikar-e-gul par
tumhārī yaad ko ḳhushbū ke ghar meñ rakkhā hai

rulā.egī mirī yaad un ko muddatoñ sāhab
kareñge bazm meñ mahsūs jab kamī merī

allāh hī kī yaad bahar-hāl ḳhalq meñ
vaj.h-e-sukūn-e-ḳhatir-e-andoh-gīñ rahī

koī sharīk-e-ġham nahīñ ab terī yaad ke sivā
koī anīs-e-dil nahīñ ab tere naam ke sivā

maiñ ne tum ko dekhā hai
yaad ab nahīñ aatā

mohabbat ne har ik se be-ta.alluq kar diyā mujh ko
tumhārī yaad bhī ab to barā.e naam aatī hai

vo ek Tiis jise terā naam yaad rahā
kabhī kabhī to mire dil kā saath chhoḌ ga.ī

ai mire dāman-e-sad-chāk pe hañsne vaale
yaad kar terā garebāñ bhī siyā hai maiñ ne

tujh bin to ham ne ve bhī bā-ḳhāmoshī adā kiiñ
yaad ā.ī.āñ jo bāteñ do-chār baiThe baiThe

mire dil ke ḳhuun kī misl thā tujhe yaad hai mire dilrubā
koī rañg rañg-e-hinā bhī thā tire naqsh-hā-e-jamāl meñ

hai parda-andar-parda vo aur arz-o-samā kā nuur bhī hai
jab yaad karo nazdīk hai vo jab DhūñDo us ko duur bhī hai

aap kī yaad kā bas ek diyā
hai bahut dil kī raushnī ke liye

taḌap taḌap ke jiye jis ke pyaar meñ 'afshāñ'
usī kī yaad meñ lo aaj jaan bhī de dī

bikhre hue ḳhvāboñ kī vo tasvīr hai shāyad
ab ye bhī nahīñ yaad kahāñ us se milā thā

ye yaad rahe aan pe mar miTte haiñ ham log
mat bhūlnā ham jaan bhī pyārī nahīñ rakhte