Tags-Yaad

saaqī tire lutf-e-ām se ham vāqif haiñ magar ye yaad rahe
is daur meñ kam raas aatī hai shīshe ko duā paimāne kī

yaad aatī jab kabhī ehsās kī nīlam-parī
ghar ke kaale dev kā qissa purānā ho gayā

batā kyā kyā tujhe ai shauq-e-hairāñ yaad aatā hai
vo jān-e-ārzū vo rāhat-e-jāñ yaad aatā hai

pareshāñ-ḳhātirī had se guzartī hai to vahshat ko
kisī kā ālam-e-zulf-e-pareshāñ yaad aatā hai

guzartā hai kabhī jab chaudhvīñ kā chāñd badlī se
mahīn āñchal meñ un kā rū-e-tābāñ yaad aatā hai

añdherī raat meñ jugnū chamakte haiñ to rah rah kar
dupaTTe ke sitāroñ kā charāġhāñ yaad aatā hai

ufuq par phailtī haiñ surḳhiyāñ jab sub.h-e-tāza kī
koī siina pas-e-chāk-e-garebāñ yaad aatā hai

kalī ko phuul bante dekh kar ahd-e-bahārāñ meñ
koī chehra bahut nau-ḳhez-o-ḳhandāñ yaad aatā hai

ġhazal jab chheḌ detā hai koī ahd-e-javānī kī
kisī kā jism-e-mauzūn-o-ġhazal-ḳhvāñ yaad aatā hai

vo tūfāñ karvaTeñ letā thā jo ik jism-e-rā.anā meñ
vo tūfāñ ham-kinārī kā vo tūfāñ yaad aatā hai

vo armāñ jo kisī ke shoḳh hoñToñ par machaltā thā
vo armāñ bosa-e-lab kā vo armāñ yaad aatā hai

vufūr-e-shauq se ḳhud haath apne chuum letā huuñ
vufūr-e-shauq meñ jab un kā dāmāñ yaad aatā hai

bahut kuchh yaad aatā hai 'ra.īs' un kī judā.ī meñ
magar jaise koī ḳhvāb-e-pareshāñ yaad aatā hai

ek jhoñkā is tarah zanjīr-e-dar khaḌkā gayā
maiñ ye samjhā bhūlne vaale ko maiñ yaad aa gayā

bhulātā huuñ phir bhī vo yaad aa rahe haiñ
vahī chāhte haiñ maiñ kyā chāhtā huuñ

terī jo yaad ai dil-ḳhvāh bhūlā
billāh bhūlā vallāh bhūlā

darvāza māyūs hai shāyad sog meñ hai añgnā.ī bahut
ik muddat par apne ghar kī aa.ī to yaad aa.ī bahut

guloñ ko dekh ke ab raakh yaad aatī hai
ḳhayāl kā vo suhānā talāzima bhī gayā

vo bhalā sā naam thā kyā kahūñ mujhe ḳhud bhī yaad nahīñ rahā
mirī zindagī ke qarīb meñ vo jo ek musht-e-ġhubār hai

kiyā ḳhalvat meñ mujh ko qatl aur mahfil meñ rote ho
qayāmat Dhā ke achchhā yaad hai mahshar bapā karnā