Tags-Yaad

jab bhī safar par jaane lago to yaad rahe
ḳhud ko bhī sāmān meñ rakhnā paḌtā hai

mujhe kyuuñ aaj hichkī aa rahī hai
koī yaad aa.ī aur un ko jafā kyā

tū nahīñ hai to har ik jur.a-e-mahtāb-sifat
yaad kī aañkh se Tapkī huī tanhā.ī hai

tumheñ yaad hai mire sāthiyo ki bichhaḌ ga.e the vahīñ se ham
tumheñ dard-e-dil kī davā milī mujhe dard-e-dil kī duā milī

aah be-iḳhtiyār kartā huuñ
yaad jab us kā pyaar kartā huuñ

rāsta rok rahī hai ik yaad
ye bhī dīvār girānī hai abhī

biite baras kī yaad kā paikar utaar de
dīvār se purānā calendar utaar de

bas itnā yaad hai tujh se milā thā raste meñ
phir apne aap se rahnā paḌā judā barsoñ

badlī sī apnī ā.ankhoñ meñ chhā.ī huī sī hai
bhūlī huī sī yaad phir aa.ī huī sī hai

zikr jab hogā mohabbat meñ tabāhī kā kahīñ
yaad ham ā.eñge duniyā ko havāloñ kī tarah

yuuñ tirī yaad se hotā hai ujālā dil meñ
chāñdnī meñ chamak uThtā hai bayābāñ jaise

us kā mujhe shab yaad dilāyā ruḳh-e-pur-nūr
shakl apnī dikhā kar mah-e-kāmil ne satāyā

yuuñ jī bahal gayā hai tirī yaad se magar
terā ḳhayāl tere barābar na ho sakā

aur kuchh der na guzre shab-e-furqat se kaho
dil bhī kam dukhtā hai vo yaad bhī kam aate haiñ

vasl meñ kyā visāl mushkil thā
yaad par roz hijr kā na rahā

phir tirī yaad na.e ḳhvāb dikhāne aa.ī
chāñdnī jhiil ke paanī meñ nahāne aa.ī

aisā bichhḌā ki milā hī nahīñ phir us kā pata
haa.e vo shaḳhs jo aksar mujhe yaad aatā hai

ai dard kabhī uTh bhī sahī tañgi-e-dil se
muddat se dar-e-dil pe koī yaad khaḌī hai

tirī yaad aaj aaise dil-e-mubtalā meñ aa.ī
sar-e-dasht-e-shām jaise shab-e-nau-bahār aa.e

kirshn kī aaj yād-e-rafta mahfil-e-zinda karo
brij-o-gokul kī bujhī sham.oñ ko tābinda karo