Tags-Zindagi

kisī kā jism huā jān-o-dil kisī ke hue
hazār TukḌe mirī ek zindagī ke hue

badal sakā na koī apnī qismatoñ kā nizām
jo tū ne chāhā vahī haal zindagī ke hue

navā navā meñ mirī zindagī machaltī hai
rabāb-e-husn-o-mohabbat pe naġhma-ḳhvāñ huuñ maiñ

mirā tajassus-e-paiham hai zindagī-āmoz
mujhe qarār nahīñ hai ravāñ-davāñ huuñ maiñ

fanā kī zad se hai mahfūz zindagī merī
shi.ār merā mohabbat hai jāvedāñ huuñ maiñ

zindagī zaḳhm sahī zaḳhm kā darmāñ kiije
koī is shahr meñ zaḳhmoñ kā ḳharīdār nahīñ

qayāmat hai agar yuuñ zindagī nākām ho jaa.e
vo pahlū meñ na hoñ aur garmiyoñ kī shaam ho jaa.e

jiyā lekin mirā jiinā kisī ke bhī na kaam aayā
maiñ martā huuñ ki shāyad zindagī paiġhām ho jaa.e

apne pindār kī laash Dhote rahe
zindagī apnī is meñ basar ho ga.ī

ufuq ke us paar zindagī ke udaas lamhe guzār aa.uuñ
agar mirā saath de sako tum to maut ko bhī pukār aa.uuñ

badal ga.e zindagī ke mehvar tavāf-e-dair-o-haram kahāñ kā
tumhārī mahfil agar ho baaqī to maiñ bhī parvāna-vār aa.uuñ

zindagī ko harām mat karnā
shauq ko be-lagām mat karnā

chaman meñ sirf hamīñ rāzdāñ haiñ kāñToñ ke
guloñ ke saath basar ham ne zindagī kī hai

shāyad ki aur bhī kahīñ bastī hai zindagī
lagtā hai aur bhī kahīñ aisā jahān hai

zindagī vālā-o-shaidā rahī farzānoñ kī
naam raushan hue har daur meñ dīvānoñ ke

zindagī sirf ġham huī 'hirmāñ'
ab kisī ġham kā ehtimāl kahāñ

'habīb' is zindagī ke pech-o-ḳham se ham bhī nālāñ haiñ
hameñ jhūTe nagīnoñ kī chamak bhātī nahīñ shāyad

ishq bhī zindagī kī la.anat thā
aql bhī zindagī kī la.anat hai

mirī zindagī hai tanhā tumheñ kuchh asar to hotā
koī dost tum sā hotā koī ham-safar to hotā

āmad-o-shud kūche meñ ham us ke kyuuñ na kareñ mānind-e-nafas
zindagī apnī jānte haiñ is vāste aate jaate haiñ