Tags-Zindagi

zindagī karnā vo mushkil fan hai 'ash.har' hāshmī
jaise ki chalnā paḌe bijlī ke nañge taar par

hādse zindagī kī alāmat haiñ lekin vo ik hādsa
ham jise maut kahte haiñ

ye zindagī umr bhar kā ronā
ghabrā ga.e intizār se ham

ḳhvāb irfān-e-haqīqat ke tamannā.ī the
zindagī aur mirī rāhbarī rahnā thī

vo ḳhvāb jo merī zindagī the
vo kab ke raddī kī Tokarī meñ

yahī zindagī mirī zindagī yahī zindagī mirī maut hai
tirī yaad ban ga.ī ik chhurī jo mire gale pe dharī rahī

zindagī ik savāl hai jis kā javāb maut hai
maut bhī ik savāl hai jis kā javāb kuchh nahīñ

yaañ shab-o-roz hai matlab kise ḳhair-o-shar se
zindagī kā hai ajab silsila sīm-o-zar se

zindagī kyuuñ na mire maut pe un kī jo log
muskurāte hue zindāñ se sar-e-dār aa.e

jise log kahte haiñ tīrgī vahī shab hijāb-e-sahar bhī hai
jinheñ be-ḳhudī-e-fanā milī unheñ zindagī kī ḳhabar bhī hai

tū zamāñ makāñ se guzar bhī jā tū rah-e-adam ko bhī kaaT le
vo savāb ho ki azaab ho kahīñ zindagī se mafar bhī hai

koī ahl-e-dil ko kamī nahīñ magar ahl-e-dil kā ye qaul hai
abhī maut bhī nahīñ mil sakī abhī zindagī meñ kasar bhī hai

zindagī chāheñ to ḳhvāboñ se sivā kuchh na mile
Dūbnā chāheñ to hāsil hameñ dariyā hī na ho

hijr ko shauq-e-mudāvā hī samajh kar jī leñ
zindagī tujh se ulajhne kā to yaarā hī na ho

ab tak jo zindagī hai guzrī
kāñTe nafas meñ bo rahā huuñ

khulī kitāb ke jaisī hai zindagī apnī
kisī ke sāmne chehra nahīñ badalte ham

pyaar ke saat rañgoñ kī qaus-e-quzah le ke aa.e 'sabīla' vo milne kabhī
zindagī phir vahīñ ruk ke hañstī rahe din nikaltā rahe shaam Dhaltī rahe

chilmanoñ ke us taraf jagmagātī zindagī
sāmne aa kar naqāb-e-ruḳh ko sarkātī huī

chilmanoñ ke is taraf se jagmagātī zindagī
sāmne aa kar naqāb-e-ruḳh ko sarkātī huī

maiñ zindagī se nabard-āzmā rahā huuñ 'farāz'
maiñ jāntā thā yahī raah ik bachāv kī thī