Tags-Zindagi

judā.ī kā bas ek pal girāñ thā zindagī pe jab
to darmiyān bahr-e-māh-o-sāl kaise aa gayā

shart har manzūr kar lī zindagī kī maiñ ne bhī
dastaḳhat ab is qarār-e-zīst par merā bhī hai

ālamoñ kī baat kā 'saurabh' bharosa hai mujhe
tajraba kuchh zindagī kā haañ magar merā bhī hai

na jaane kis tabāhī kī taraf le jā.egī ab
hamārī zindagī be-sāḳhta baḌhtī huī sī

hijr jaise vasl meñ us ko sunā to yuuñ lagā
maut jaisī zindagī meñ zindagī āvāz hai

har ik manzil qayām-e-rahguzar ma.alūm hotī hai
hameñ to zindagī paiham safar ma.alūm hotī hai

ḳhushī dāman-kashāñ hai dil asīr-e-ġham hai barsoñ se
hamārī zindagī kā ek hī aalam hai barsoñ se

hamārī zindagī kahne kī had tak zindagī hai bas
ye shīrāza bhī dekhā jaa.e to barham hai barsoñ se

lauh-e-jahāñ se peshtar likkhā thā kyā nasīb meñ
kaisī thī merī zindagī kuchh to chale pata mujhe

zindagī se bhī nibāheñ tujhe apnā bhī kaheñ
is kashākash meñ shab o roz guzar jaate haiñ

tū ne bhī uḌaa.ī hai hasīñ zindagī merī
tū bhī to mire ġham kī tamāshā.ī huī hai

kabhī āñkhoñ pe kabhī sar pe biThā.e rakhnā
zindagī talḳh sahī dil se lagā.e rakhnā

zindagī in se sivā niklī yahāñ
falsafe saare ḳhayālī hī rahe

faqīh-e-shahr kī har baat maan lo chup-chāp
agar savāl uThāyā, to zindagī se ga.e

mirā e'tibār adam vajūd se uTh gayā
vo jo zindagī kī misāl thā so nahīñ rahā

dam-e-aḳhīr us ko ab na socheñ ye sochnā chāhiye thā pahle
ma.aal kyā hogā zindagī kā jahān-e-fānī hai aur ham haiñ

zindagī ke udaas lamhoñ meñ
aur kitne azaab ā.eñge

zarūrī hai ham apnī zindagī ko aa.ina rakkheñ
ye chādar kaun oḌhegā agar dhabbe nikal aa.e

bhulā de mujh ko ki bevafā.ī bajā hai lekin
gañvā na mujh ko ki maiñ tirī zindagī rahā huuñ

go safedī mū kī yuuñ raushan hai juuñ āb-e-hayāt
lekin apnī to isī zulmāt se thī zindagī