Tags-Zindagi

zindagī dard sarāpā hī nahīñ pyaar bhī hai
aao is pyaar ko naġhmoñ meñ sajā kar dekheñ

koī āsāñ nahīñ thā zindagī se kaT ke jiinā
bahut mushkil dinoñ meñ rābta rakkhā hai tum ne

zindagī jabr-e-musalsal ke sabab
sar-nigūñ sāyoñ kā sahrā-e-sukūt

ḳhayāl-e-ḳhām meñ guzrī hai zindagī saarī
haqīqatoñ kā gumāñ hai abhī fasānoñ par

'jigar' hai zindagī jab tak ki garmī hai mohabbat kī
huā jab sard siina to jiye jaane se kyā hāsil

mukammal zindagī karne kī chāhat kuchh nahīñ hotī
jo lamha mil gayā jī lo riyāzat kuchh nahīñ hotī

'siyā' sab kah rahe haiñ zindagī kī aur ab dekho
magar dil kī tamannāoñ ko mar jaane kī jaldī hai

barf hī barf nazar aatī hai tā-hadd-e-nazar
zindagī ham ne tirī khoj meñ jā kar dekhā

tamām-umr guzar jaa.e tujh tak aane meñ
na itnī duur se ai zindagī pukār mujhe

bikhre bikhre ḳhvāb haiñ mere liye
reza reza zindagī hai aur maiñ

ho raqs zindagī ke jahannam ke ird-gard
parvāna ban ke kis liye jal jaanā chāhiye

chal fanā ke safar meñ yahī raḳht hamrāh le kar chaleñ
is qadar muḳhtasar zindagī meñ to ġham ḳharch hogā nahīñ

mil ke do qalb jab bichhaḌte haiñ
zindagī zindagī ko rotī hai

tirī nazar sabab-e-tishnagī na ban jaa.e
kahīñ sharāb mirī zindagī na ban jaa.e

tire baġhair zamāne ko muñh dikhā na sakūñ
ye zindagī kahīñ sharmindagī na ban jaa.e

is tarah mil ki mulāqāt adhūrī na rahe
zindagī dekh koī baat adhūrī na rahe

azā.em shal qavā maflūj dil be-kār ho jaa.e
agar āsāniyāñ hoñ zindagī dushvār ho jaa.e

kyā zindagī ne rakkhī sauġhāt mere haq meñ
har jiit us ko hāsil har maat mere haq meñ

us ne mire baġhair guzārī hai zindagī
is āgahī kā zahr gavārā nahīñ huā

ḳhud pe ilzām kyuuñ dharo baabā
zindagī maut hai maro baabā