Tags-Zindagi

ham haiñ aur un kī ḳhushī hai āj-kal
zindagī hī zindagī hai āj-kal

koī 'nazmī' guzār kar dekhe
maiñ ne jo zindagī guzārī hai

zindagī naam tanaffus kā nahīñ hai jānāñ
shikva be-jā hai ki bin tere bhī maiñ zinda huuñ

qahqaha mārte hī dīvāna
har ġham-e-zindagī ko bhuul gayā

zindagī bhar ham isī ummīd par chalte rahe
ab ke sahrā paar kar leñ to samundar aa.egā

kaise afsūñ the vahāñ kaise fasāne the udhar
zindagī tujh se ta.alluq ke bahāne the udhar

milā usī ko maza zindagī kā ai 'sābir'
jo mar-miTā hai kisī shoḳh-e-pārsā ke liye

be-charāġhāñ bastiyoñ ko zindagī de
ik sitam aisā bhī kar ījād taaza

isī māmūra-e-ḳhvābīdgāñ shahr-e-ḳhamoshāñ meñ
na jaane zindagī kā svāñg kab se bhar rahā huuñ maiñ

haañ yahīñ dafn haiñ vo saarī kitābeñ jin ko
zindagī detī jo fursat to maiñ likh saktā thā

kuchh aaise haiñ jo zindagī ko mah-o-sāl se nāpte haiñ
gosht se saag se daal se nāpte haiñ

adā huā na qarz aur vajūd ḳhatm ho gayā
maiñ zindagī kā dete dete suud ḳhatm ho gayā

is kī sūrat jo chāho badal jā.egī jaise sāñche meñ Dhāloge Dhal jā.egī
koī sāñcha yahāñ harf-e-āḳhir nahīñ zindagī to hamesha badaltī rahī

zindagī kis tarah tumhārī 'nizām'
uljhanoñ se ulajh ga.ī dekho

ab bhī ik umr pe jiine kā na andāz aayā
zindagī chhoḌ de pīchhā mirā maiñ baaz aayā

jo zindagī thī mirī jaan! tere saath ga.ī
bas ab to umr ke naqshe meñ vaqt bharnā hai

ham se lafzoñ ne zindagī paa.ī
aur qistoñ meñ mar rahe haiñ ham

zindagī jis se jāgtī hai abhī
vo kahānī to an-kahī hai abhī

zindagī kaun se nā-karda gunah kī hai sazā
ḳhud nahīñ jāntā kyā auroñ ko batlā.ūñ maiñ

mujh ko mirī shikast kī dohrī sazā milī
tujh se bichhaḌ ke zindagī duniyā se jā milī