Tags-Zindagi

guzar ga.e haiñ jo din un ko yaad karnā kyā
ye zindagī ke liye roz roz marnā kyā

guzar rahī hai ġhanīmat hai zindagī maanā
magar ye ek hī andāz se guzarnā kyā

baaz aa.e zindagī ke ḳhvāb-e-rañgā-rañg se
dast o pā gum kar diye andesha-e-tābīr ne

maiñ muddatoñ saqf-e-zindagī par khaḌe khaḌe tum ko dekh aayā
ye tum bhī kyā ho ki aa.e mujh ko nazar bahut der ba.ad jā kar

vahī ḳhasta-hāl ḳharāb hai vahī ḳhvāb kushta-e-ḳhvāb hai
vahī zindagī ko javāb hai na salām hai na payām hai

vahī ḳhvāb-o-ḳhur kī talāsh hai vahī jān-o-dil meñ ḳharāsh hai
vahī rañj-e-ġhair-e-ma.āsh hai mujhe zindagī bhī harām hai

kis darja dil-fareb haiñ jhoñke umiid ke
ye zindagī huī hai gavārā kabhī kabhī

zindagī ab ke mirā naam na shāmil karnā
gar ye tai hai ki yahī khel dobāra hogā

zindagī kahte haiñ jis ko chaar din kī baat hai
bas hamesha rahne vaalī ik ḳhudā kī zaat hai

safar āġhāz karnā thā jahāñ se zindagī kā
hameñ un rāstoñ se ab guzārā jā rahā hai

ta.alluq zindagī se muḳhtasar rakkhā huā hai
ki shānoñ par nahīñ neze pe sar rakhā huā hai

zarā sī chaa.e girī aur daaġh daaġh varaq
ye zindagī hai ki aḳhbār kā tarāshā hai

iztirāb-e-dil meñ aa jā kar davām aa hī gayā
zindagī ko ek hālat par qayām aa hī gayā

bandagī-āmoz bazm-e-zindagī bechārgī
aadmī ko jab ġharaz aTkī salām aa hī gayā

tundī-e-sail-e-vaqt meñ ye bhī hai koī zindagī
sub.h hui to jī uThe raat hui to mar ga.e

tasvīr-e-zindagī meñ nayā rañg bhar ga.e
vo hādse jo dil pe hamāre guzar ga.e

zindagī bhar maiñ khulī chhat pe khaḌī bhīgā kī
sirf ik lamha barastā rahā sāvan ban ke

zindagī kyā hai
pyaar hai mohabbat hai

dī zindagī aur us kā sāmāñ
kyā shaan hai banda-parvarī kī

maut kahte haiñ jis ko ai 'sāġhar'
zindagī kī koī kaḌī hogī