Tags-Zindagi

kuchh zindagī to mujh se masā.il ne chhīn lī
jo bach ga.ī thī hādse barbād kar ga.e

ba-qaul-e-'rāz' niklo ma.arke se
ye duniyā hai jahāñ tak zindagī hai

usī ek fard ke vāste mire dil meñ dard hai kis liye
mirī zindagī kā mutāliba vahī ek fard hai kis liye

nahīñ hai ġhair az numūd kuchh bhī jo mudda.ā terī zindagī kā
tū ik nafas meñ jahāñ se miTnā tujhe misāl sharār hogā

haañ jise āshiqī nahīñ aatī
lazzat-e-zindagī nahīñ aatī

āgahī ke dar khule to zindagī achchhī lagī
ham-damoñ kī bhiiḌ meñ begāngī achchhī lagī

jis ko ki urf-e-ām meñ kahte haiñ zindagī
ye nashsha apne vaqt se pahle utar na jaa.e

is liye dil burā kiyā hī nahīñ
zindagī merā faisla hī nahīñ

mohabbat ke maze se dil nahīñ hai āshnā jis kā
na us kī zindagī achchhī na us kī maut hī achchhī

tumhī shāmil nahīñ jab zindagī meñ
bhalā ham kyā hamārī zindagī kyā

nashsha thā zindagī kā sharāboñ se tez-tar
ham gir paḌe to maut uThā le ga.ī hameñ

zaḳhm-e-sar hai aap apnī dāstān
pattharoñ se zindagī pūchhegī kyā

vahī sub.h-o-masā vahī shab-o-roz
zindagī hai vabāl kyā kahiye

zindagī ek safar ḳhauf kī zanjīr ke saath
maut ik ḳhvāb-e-girāñ hashr kī ta.abīr ke saath

jānī-pahchānī huī shakl bhī mub.ham sī lage
zindagī kā ye fusūñ apnī hī tasvīr ke saath

varaq āhistagī se kholiyegā
bahut ḳhasta kitāb-e-zindagī hai

haiñ udāsī ke kokh-jā.e ham
zindagī ko na raas aa.e ham

ab jo chāhūñ bhī to maiñ shaad nahīñ ho saktā
zindagī kyoñ tujhe nāshād kiyā hai maiñ ne

yahāñ har lafz ma.anī se judā hai
haqīqat zindagī se māvarā hai

munavvar jis ke dam se thiiñ hamārī zindagī 'mītā'
vahī mahtāb gar mastūr ho jaa.e to kyā kiije