Tags-Zindagi

ab to yaad aatā nahīñ kaisā thā apnā rañg-rūp
phir mirī sūrat dikhā de zindagī ai zindagī!

ek muddat ho ga.ī rūThā huuñ apne-āp se
phir mujhe mujh se milā de zindagī ai zindagī!

jaane bargashta hai kyuuñ mujh se zamāne kī havā
apne dāman kī havā de zindagī ai zindagī!

rach gayā hai merī nas nas meñ mirī rātoñ kā zahr
mere sūraj ko bulā de zindagī ai zindagī!

ta.amīr-e-zindagī ko numāyāñ kiyā gayā
taḳhrīb-e-kā.enāt kā sāmāñ kiyā gayā

jiite rahnā tire tasavvur meñ
zindagī hai ki ḳhud-kushī tauba

daur-e-hañgāma-e-jahāñ se 'qamar'
kaise guzregī zindagī tauba

zindagī ik duur tak sañgīt thī ab shor hai

asl meñ hindostāñ kā bādshah lekin ġhulām
zindagī kī dūsrī manzil meñ hai garm-e-ḳhirām

vo zindagī ho ki duniyā 'farāz' kyā kiije
ki jis se ishq karo bevafā nikaltī hai

ba-saḳhtī-hā-e-qaid-e-zindagī mālūm āzādī
sharar bhī said-e-dām-e-rishta-e-rag-hā-e-ḳhārā hai

kahāñ tak bojh baisākhī kā saarī zindagī Dhote
utarte hī kuñ.eñ meñ aaj rassī khol dī ham ne

maut aa.egī us se mil leñge
ab chalo zindagī se milte haiñ

so ga.e peḌ jaag uThī ḳhushbū
zindagī ḳhvāb kyuuñ dikhātī hai

kuchh aaise log bhī tanhā hujūm meñ haiñ chhupe
ki zindagī unheñ pahchān kar duhā.ī na de

jab se paḌhī chatā.ī-nashīnoñ kī zindagī
moTā mahīn jo bhī milā khā pahan liyā

koī bhī pechīdgī haa.el nahīñ anvar-'sadīd'
zindagī hai sāmne manzar-ba-manzar aur maiñ

ġham-e-dil hī merā nikāl do mirī zindagī se jo tum agar
to vo dāstāñ hī kuchh aur hai mire hāl-e-dil kā bayāñ nahīñ

ajiib qaid meñ dam hai ye kaisā jiinā hai
ki zindagī huī jaatī hai maut kī ġhammāz

firāq-e-yār meñ har lamha zindagī hai azaab
darāz silsila-e-zīst hai bahut hī darāz