Tags-Zindagi

zindagī tujh pe likhūñgā na ziyāda ab kuchh
jo bhī mazmūn tirī mad.h meñ likkhe likkhe

aarzū rifāqat kī aadmī kī fitrat hai
zindagī nahīñ kaTtī aap hoñ ki ham tanhā

zindagī kī rāhoñ meñ saath chhoḌne vaalo
kaash dekh lete tum chal ke do-qadam tanhā

amal se dosto duniyā hai jannat bhī jahannam bhī
nisāb-e-zindagī insāñ ke kirdāroñ pe likkhā hai

āñkhoñ meñ aa ke merī jo ik ḳhvāb bas gayā
phir is ke baad zindagī be-ḳhvāb sī rahī

kyā chāhtī hai ham se hamārī ye zindagī
kyā qarz hai jo ham se adā ho nahīñ rahā

hālāt ne kisī se judā kar diyā mujhe
ab zindagī se zindagī mahrūm ho ga.ī

zindagī ham se chāhtī kyā hai
chāhtī kyā hai zindagī ham se

is se aage zindagī āsān hai
girne vāloñ ko sambhalnā chāhiye

tirī ḳhushī se agar ġham meñ bhī ḳhushī na huī
vo zindagī to mohabbat kī zindagī na huī

aur kyā nazr karūñ ai ġham-e-dildār-e-farāz
zindagī jo ġham-e-duniyā se bachā.ī le le

ek siitā kī rifāqat hai to sab kuchh paas hai
zindagī kahte haiñ jis ko raam kā ban-bās hai

chal zindagī kī jot jagā.e ajab nahīñ
lāshoñ ke darmiyāñ koī rasta dikhā.ī de

tahī zindagī se nahīñ ye fazā.eñ
yahāñ saikḌoñ kārvāñ aur bhī haiñ

'ārif'-husain dhokā sahī apnī zindagī
is zindagī ke ba.ad kī hālat bhī hai fareb

TūTte haiñ to bikhar jaate haiñ miTTī ke hurūf
zindagī jin se charāġhoñ kā chalan māñge hai

ḳhud us kī zindagī ab us se barham hotī jaatī hai
unheñ hogā bhī pās-e-ḳhātir-e-'qābil' to kyā hogā

duā hai apnī yahī shab-e-ġham na ho kabhī iztirāb-e-dil kam
ye zindagī zindagī kahāñ phir jo dil ko apne qarār aayā

laakh ham marhala-e-dār-o-rasan se guzre
zindagī se na hue phir bhī gurezāñ yaaro