Tags-Zindagi

jab se nahīñ vo naġhma-zan-e-sāz-e-zindagī
ik ek taar dil kā mujhe be-sadā milā

zindagī zahr kā ik jaam huī jaatī hai
kyā se kyā ye mai-e-gulfām huī jaatī hai

havas-e-sair-e-tamāsha hai ki hotī nahīñ ḳhatm
zindagī hai ki subuk-gām huī jaatī hai

zindagī jis kī mire dam se ibārat ho 'zafar'
kyuuñ kahe koī use jaan se pyārā na kahūñ

kabhī apnī aañkh se zindagī pe nazar na kī
vahī zāviye ki jo aam the mujhe khā ga.e

vo nagīñ jo ḳhātim-e-zindagī se phisal gayā
to vahī jo mere ġhulām the mujhe khā ga.e

ġham salāmat rahe ḳhudāvandā
zindagī kā yahī sahārā hai

mansūb kar duuñ maiñ jo tirī zindagī ke saath
yādoñ kā mere paas ḳhazāna to hai nahīñ

ek aañsū yaad kā Tapkā to dariyā ban gayā
zindagī bhar mujh meñ ek tūfān sā paltā rahā

kisī aañkh meñ nahīñ ashk-e-ġham tire ba.ad kuchh bhī nahīñ hai kam
tujhe zindagī ne bhulā diyā tū bhī muskurā use bhuul jā

kyuuñ aTā huā hai ġhubār meñ ġham-e-zindagī ke fishār meñ
vo jo dard thā tire baḳht meñ so vo ho gayā use bhuul jā

be-hisī kā sard mausam zindagī par chhā gayā
dil meñ raushan the jo añgāre vo sab kajlā ga.e

zindagī kyuuñ hai larza-bar-andām
zalzale bhī shadīd ho ga.e kyā

hijr hijrat malāl ġham āsār
zindagī kī naved ho ga.e kyā

kitnā dilkash fareb-e-hastī hai
zindagī maut ko tarastī hai

maut aa kar jise uThā.egī
zindagī vo hijāb-e-hastī hai

har vaqt haiñ maut kī duā.eñ
allāh re lutf zindagī kā

samjhe the na ham ko tum pe marnā
ho jā.egā rog zindagī kā

hairāñ maiñ pahlī baar huā zindagī meñ kal
apnī jhalak dikhā.ī paḌī thī kisī meñ kal

bharā huā hai nigāhoñ meñ zindagī ke dhuāñ
bas ek sho.ala-e-shab-tāb meñ sharar kyuuñ hai