Tags-Baam

kisī intizār-e-nazar meñ hai
koī raushnī kisī baam par

ḳhvāb dekhūñ koī mahtāb lab-e-bām utre
yuuñ bhī ho jaa.e murād-e-dil-e-nākām utre

tanhā.ī meñ aa jaatī haiñ hūreñ mire ghar meñ
chamkāte haiñ masjid ke dar-o-bām farishte

ye raat kitnī bhayānak hai bām-o-dar ke liye
kahāñ se lā.ūñ sirāj-e-munīr ghar ke liye

bām-o-dar tak na rahe ghar ke to ghar kyā apnā
ab falak bhī na haTā le kahīñ saayā apnā

jagah jagah bām-o-dar ke paikar
ufuq ke rañgīn chaukhaTe meñ

aayā vo baam par to kuchh aisā lagā 'munīr'
jaise falak pe rañg kā bāzār khul gayā

gavāh haiñ mire ghar ke ye bām-o-dar saare
ki tere ba.ad yahāñ dūsrā rahā hī nahīñ

kis baam se aatī hai tirī zulf kī ḳhushbū
dil yādoñ ke ziine pe khaḌā soch rahā hai

Dare hue haiñ sabhī log abr chhāne se
vo aa.ī baam pe kyā dhuup ke bahāne se

abhī tak bām-o-dar haiñ phuul jaise
mire ghar bhī vo ḳhush-manzar gayā thā

huuñ muntazir ki koī aaj aane vaalā hai
ba-qadr-e-zauq dar-o-bām ko sajāne de

ghabrā ke bām-o-dar ke sulagte sukūt se
jhāñkā hī thā galī meñ ki sañg-e-sadā lagā

ek aahaT kī aas meñ kab se
haiñ 'hinā' dil ke bām-o-dar Thahre

vo din ga.e ki chhup ke sar-e-bām ā.eñge
aanā huā to ab vo sar-e-ām ā.eñge

vo raqs karne lagīñ havā.eñ vo badliyoñ kā payām aayā
ye kis ne bikhrā.īñ ruḳh pe zulfeñ ye kaun bālā-e-bām aayā

utaar laate unheñ bām-e-tūr se dil meñ
ham iḳhtiyār vo andāz-e-guftugū karte

lab tak jo kabhī na aa.e vo aah
ūñchī so baam ho ga.ī hai

mai-ḳhāna salāmat hai to ham surḳhī-mai se
taz.īn-e-dar-o-bām-e-haram karte raheñge

zer-e-bām gumbad-e-ḳhazrā azaañ
vo bilālī saut vo sāme.a kahāñ