Tags-Baam

kyuuñ hote ho 'bahr' tasht-az-bām
chilman chhoḌvā do sāmnā hai

us ek sham.a se utre haiñ bām-o-dar ke libās
us ek lau ne baḌe phūl-ban jalā.e haiñ

ḳhatar-pazīr huuñ us be-dilī meñ girya bhej
ye zalzala hī mire bām-o-dar sambhālegā

vaqt ke andhe kuñ.eñ meñ pal rahī hai zindagī
ai mire husn-e-taḳhyyul baam se nīche utar

bām-o-dar kaañp uThe haiñ 'bāqī'
is tarah jhuum ke bādal aa.e

bām-o-dar par aaj miTTī ke diye haiñ is tarah
āsmānoñ par sitāre jagmagā.eñ jis tarah

tū bhī hare darīche vaalī aa jā bar-sar-e-bām hai chāñd
har koī jag meñ ḳhud sā DhūñDe tujh bin base ārām hai chāñd

masjid kī sīḌhiyoñ pe gadāgar ḳhudā kā naam
masjid ke bām-o-dar pe amiir o kabīr maiñ

mere vīrān darīchoñ meñ bhī ḳhushbū jaage
vo mire ghar ke dar-o-bām sajāne aa.e

kin kin bulandiyoñ se ulajhtā rahā hai zehn
ye āsmāñ jhalak bhī nahīñ us ke baam kī

vo baam pe phir jalva-numā mere liye hai
gul-bār-o-ziyā-bār fazā mere liye hai

raat mujh se bhī to har ghar ke dar-o-bām saje
chāñd kī tarah mirā aks ḳhayālī niklā

muñh chhupā.e hue hāthoñ se guzar jaatā hai
hasrat-e-dīd dar-o-bām se sar phoḌtī rah jaatī hai

kahīñ rahte haiñ dar-o-bām nadāmat se ḳhamosh
bikhrī īñToñ meñ kahīñ jāh-o-hasham bolte haiñ

lauT aa.egā kisī shaam yahī lagtā hai
jagmagā.eñge dar-o-bām yahī lagtā hai

dar-o-bām kā 'bahr' ḳhvāhāñ nahīñ maiñ
mire āshiyāne meñ saayā to hotā

bechain kiye rahtī hai jis kī talab-e-dīd
ab baam pe vo chāñd nikaltā hī nahīñ hai

yahī ki paas thā taqdīs-e-bām kā varna
talab ke haath meñ kyā shauq kī kamand na thī

vo shoḳh baam pe jab be-naqāb aa.egā
to māhtāb-e-falak ko hijāb aa.egā

jo naqāb-e-ruḳh uThā dī to ye qaid bhī lagā dī
uThe har nigāh lekin koī baam tak na pahuñche