Tags-Baam

har har qadam pe āñkheñ thiiñ farsh-e-rāh lekin
vo raushnī kā haalā utrā na baam par se

barsoñ se ye bām-o-dar ki jin par
mahkī huī sub.h ke haiñ bose

ek añgḌā.ī se saare shahr ko niiñd aa ga.ī
ye tamāshā maiñ ne dekhā baam par hotā huā

ye anjum-o-mah-o-ḳhurshīd ho chuke būḌhe
na.ī tajallī-e-bālā-e-bām paidā kar

kaise guzrī shab-e-āshufta-sarā kis ko ḳhabar
log to baam pe hañgām-e-sahar aate haiñ

dekh kar apne dar-o-bām laraz jaatā huuñ
mire ham-sā.e meñ jab bhī koī dīvār gire

ik hamīñ muntazir nahīñ 'ālok'
muntazir bām-o-dar bhī hote haiñ

zulf-e-mushkīñ lāla-ruḳh gul-pairahan mast-e-bahār
mausam-e-gul hai tumhāre baam par aane kā naam

be-hirs-o-havā be-ḳhauf-o-ḳhatar is haath pe sar is kaf pe jigar
yuuñ kū-e-sanam meñ vaqt-e-safar nazzāra-e-bām-e-nāz kiyā

ham aise be-gharoñ ne jahāñ bhī kiyā qayām
ḳhat khīñch ke vahīñ pe dar-o-bām likh diyā

laatī hai jab sabā to chamakte haiñ bām-o-dar
ye raushnī sī kyā tirī bū-e-qabā meñ hai

ye shikāyat-e-dar-o-bām kyā ye rabāt-e-kohna kī raat kyā
koī be-charāġh shab-e-vafā tire shahr meñ bhī guzar ga.ī

ab to aa.e nazar meñ jo bhī ho
niiñd ke bām-o-dar meñ jo bhī ho

ye tilism-e-husn-e-ḳhayāl hai ki fareb tere dayār ke
sar-e-bām jaise abhī abhī koī chhup gayā hai pukār ke

vo jā.egā to is ke ba.ad dukh hī ghar meñ aa.egā
na jaane kis ummīd par saje hue haiñ bām-o-dar

mehv-e-ārā.ish-e-ruḳh hai vo qayāmat sar-e-bām
aañkh agar ā.īna hotī to nazārā karte

is ghar ke dar-o-bām bhī apne nahīñ lagte
qismat meñ na.ī naql-e-makānī to nahīñ kyā

suune paḌe haiñ dil ke dar-o-bām ai 'zahīr'
lahore jab se chhoḌ ke jān-e-ġhazal gayā

lag rahī haiñ tire āshiq kī jo āñkheñ chhat se
tuj ko dekhā thā magar un ne lab-e-bām kahīñ

ḳhushā zauq-e-talab is hasrat-e-dīdār ke sadqe
hue haiñ bām-o-dar ke rauzan o dīvār ke sadqe