Tags-Baam

zulmateñ sāya-fagan haiñ har taraf
bām-o-dar par raqs meñ nau-mīdiyāñ

miltā nahīñ kahīñ bhī dar-o-bām kā nishāñ
ham ghar meñ rah ke itne to be-ghar kabhī na the

tire ḳhayāl meñ huuñ shahr-e-raftagāñ tū bhī
kisī khañDar se ubhar aks-e-bām-o-dar se nikal

huī hai ḳhatm dar-o-bām kī kam-asbābī
mayassar aaj vo sāmān-e-inhidām huā

chhoḌ kar mere dar-o-bām vo mastūr to hai
ban ke rahtā hai magar naqsh-ba-dīvār-e-ḳhayāl

baam par aao kabhī māh-e-daraḳhshāñ kī tarah
chhup ke kyā jalnā charāġh-e-tah-e-dāmāñ kī tarah

falak par ik chāñd iid kā roz dekhne ko kahāñ se lā.ūñ
nazar kī sar-mastiyāñ na pūchho kahīñ sar-e-bām hī milegī

ham pe jis taur bhī tum chāho nazar kar dekho
haañ magar baam kī rif.at se utar kar dekho

isī ummīd par har shaam bujhā.e haiñ charāġh
ek taaza hai sar-e-bām ubharne vaalā

ab kaun dekhtā phire kyuuñ bām-o-dar jale
jo kuchh huā hai fasl-e-chaman se udhar huā

ġhazal jo tum pe 'tāhir' ne likhī thī jān-e-'tāhir'
vahī to zīnat-e-bām-e-baqā hai intihā hai

dar-o-bām sab ne sajā liye sabhī raushnī meñ nahā liye
mirī uñgliyāñ bhī jhulas ga.iiñ magar ik charāġh jalā nahīñ

hamāre āh-e-tīr-e-be-kamāñ ne ḳhāna-e-dil se
ye ruḳh pherā ki tā-bām-e-falak bāñdhā sutūnā hai

sukūt khulne lagā hai
tanhā.ī chahchahātī hai bām-o-dar par

ātish-e-ḳhurshīd se uThtā nahīñ dekhā dhuāñ
aa khaḌe ho baam par tum baal sukhlāte hue

jab koī bhī ḳhāqān sar-e-bām na hogā
phir ahl-e-zamīñ par koī ilzām na hogā

maiñ raqs kartā rahā saarī umr vahshat meñ
hazār halqa-e-zanjīr bām-o-dar meñ rahā

sarkash o sar-buland baam tirā
sar-nigūñ shahpar-e-havā mere

bām-o-dar dushmanoñ ke sāthī the
mujh ko dīvār se lagāne meñ

ujḌā huā makāñ hai ye dil jahāñ pe har shab
parchhā.iyāñ lipaT kar rotī haiñ bām-o-dar se