Tags-Baam

jagmagāte bām-o-dar jhilmilāte rauzan haiñ chamchamātī dahlīzeñ
zāhirī chamak 'āzim' turra-e-sharāfat hai raunaq-e-zamāna hai

manzar bhaTak rahe the dar-o-bām ke qarīb
maiñ so rahā thā ḳhvāb ke pichhle makān meñ

pahle to bikhar jaanā guzargāhoñ ke hamrāh
phir hasrat-e-dīvār-o-dar-o-bām meñ rahnā

sansanāte haiñ dar-o-bām-e-ḳhayāl
kar gayā kaun ye vīrān mujhe

nardbāñ kahte haiñ hai bām-e-haqīqat kā majāz
chand roz is vāste ishq-e-majāzī kījiye

chhaTe ġhubār-e-nazar bām-e-tūr aa jaa.e
piyo sharāb ki chehre pe nuur aa jaa.e

ye simaTte hue saa.e ye larazte dar-o-bām
ik na.ī sub.h ke elaan kī tayyārī hai

ik musalsal gard meñ Duube hue sab bām-o-dar
jis taraf dekho añdherā jis taraf dekho khañDar

bhīge bhīge se mire ghar ke dar-o-bām mile
shāyad aayā thā yahāñ koī samundar le kar

jis kī ḳhushbū se mahakte mire ghar ke dar-o-bām
vaqt ne rañg koī aisā dikhāyā hī nahīñ

siine pe haath hai na nazar ko talāsh-e-bām
dil saath de to aaj ġham-e-ārzū kareñ

saje hue bām-o-dar se aage kī sochtā huuñ
maiñ ghar banā kar bhī ghar se aage kī sochtā huuñ

jab bhī ga.e azāb-e-dar-o-bām thā vahī
āḳhir ko kitnī der se ghar jaanā chāhiye

nigāhoñ kā tasādum kis ne dekhā
magar ye raaz tasht az baam bhī hai

lab-e-bām aa ke abrū kī jhamak din sulh ke dikhlā
ki aalim dekhne ko shahar kā dauḌe hai mah mah kar

tumhārā shahr, tumhāre badan kī ḳhushbū ko
taras rahā hai, har ik baam tīra-e-sāmāñ hai

tumhārā shahr tumhāre badan kī ḳhushbū se
mahak rahā thaa, har ik baam tum se raushan thā

ġham-e-zamīñ se yahāñ fursat-e-nazāra kise
galī meñ tum bhī chale aao baam par kyuuñ ho

bikhere zulf ruḳh par kaun ye bālā-e-bām aayā
ḳhayāloñ kī fazā mahkī bahāroñ kā payām aayā

huī qā.il-e-jalva-e-tūr ḳhalq
sar-e-bām vo be-naqāb aa gayā