Tags-Baankpan

sar par havā-e-zulm chale sau jatan ke saath
apnī kulāh kaj hai usī bāñkpan ke saath

vo jo harf-e-tāza-misāl the unheñ jab se tū ne bhulā diyā
tirī bazm-e-nāz kā bāñkpan kisī ḳhānqāh meñ jal-bujhā

merī nazroñ meñ bāñkpan kaisā
jāgtā huuñ ki ḳhvāb dekhā hai

jis meñ thī tah-dārī-e-mansūriyat
vo anal-haq kā kahāñ hai bāñkpan

vaqt āḳhir le gayā vo shoḳhiyāñ vo bāñkpan
phuul se chehre the kitne aur the nāzuk badan

marqad meñ utārā hameñ tevrī ko chaḌhā kar
ham mar bhī ga.e par na chhuTā bāñkpan un kā

ġhairoñ hī pe chaltā hai jo ab naaz kā ḳhanjar
kyuuñ beach meñ laayā thā mujhe bāñkpan un kā

kamān-e-abru-e-ḳhūbāñ kā bāñkpan hai ġhazal
tamām raat ġhazal gaa.eñ dīd-e-yār kareñ

bāñkpan apnī tabī.at kā kabhī kam na huā
sāmne apne koī laakh tarah-dār aa.e

rañgīn bādaloñ ke ye TukḌe ye chāñdnī
aksar dilā ga.e haiñ tire bāñkpan kī yaad

sehn-e-gulshan meñ DhūñDhtī hai kabhī
shoḳh phūloñ meñ bāñkpan apnā

guloñ kā jo nikhrā huā sā badan hai
ajab hai nazākat ġhazab bāñkpan hai

'amīr' imaam batāo ye mājrā kyā hai
tumhāre sher usī bāñkpan meñ lauT aa.e

jab se Dhālā hai sitāroñ meñ nigāh-e-shauq ko
chāñd se baḌh kar tumhārā bāñkpan lagne lagā

mire dil kī āb-o-havā lagī ki vafā bhī un ko ḳhatā lagī
vahī sādgī se jo aa.e the vahī bāñkpan se chale ga.e

usī adā se usī bāñkpan ke saath aao
phir ek baar usī anjuman ke saath aao

mere asbāb nām-o-numū kyā
bas yahī bāñkpan sādgī ke

us kī jām-e-jam āñkheñ shīsha-e-badan merā
us kī band muTThī meñ saarā bāñkpan merā

kisī kā bāñkpan saare zamāne meñ pukār aayā
chamak āñkhoñ meñ aa.ī nok-e-mizhgāñ par nikhār aayā

ye bāñkpan ye adā ye shabāb kā aalam
tum aa ga.e to kisī kā ab intizār nahīñ