Tags-Baankpan

ye qissa-e-ġham-e-dil hai to bāñkpan se chale
kisī nigāh pe Thahre kisī badan se chale

zahr pī jaao bāñkpan ke saath
zahr chakhne kā tajraba na karo

kis shaan kis vaqār se kis bāñkpan se ham
guzre haiñ āzmā.ish-e-dār-o-rasan se ham

aaj ham jaan dene aa.e haiñ
kuchh dikhāte ho bāñkpan apnā

sar-nigūñ haiñ sūliyāñ mere lahū ke sāmne
tum samajhte the ki merā bāñkpan mar jā.egā

dil chāhtā hai phir koī bahkā huā sā tiir
phir khīñch le kamān usī bāñkpan ke saath

mo'atabar ho kar rahī dīvāngī apnī 'surūr'
jitne andāz-e-junūñ the bāñkpan tak aa ga.e

raunaq faroġh-e-dard se kuchh anjuman meñ hai
ḳhūn-e-jigar ġharīb kā har bāñkpan meñ hai

jo sādgī hai kuhan meñ hamāre ai 'nīraj'
kisī pe aur bhī kyā aisā bāñkpan dekhā

bāñkpan meñ aur koī shai nahīñ
sādgī kī intihā maujūd hai

tujhe ā.īne meñ na mil sakegā tirī adāoñ kā bāñkpan
agar apnā husn hai dekhnā to mirī ġhazal meñ utar ke dekh

mujhe ab nayā ik badan chāhiye
aur us ke liye bāñkpan chāhiye

sarmāya-e-nashāt sahī āmad-e-bahār
lekin use nasīb tirā bāñkpan kahāñ

qisse sune hazāroñ tasvīreñ dekhīñ lākhoñ
saj-dhaj sunī na aisī ye bāñkpan na dekhā

āshiq kī jaan jaatī hai is bāñkpan ko chhoḌ
ai but ḳhudā ke vāste apne chalan ko chhoḌ

andāz vo nahīñ hai ab vo adā nahīñ hai
pahlā sā bāñkpan to tujh meñ rahā nahīñ hai

maiñ but-tarāsh huuñ patthar se kaam hai mujh ko
magar ye tarz-e-adā tere bāñkpan kī hai

bāñkpan un kā mash.hūr thā merī dīvāngī par hamesha hañse
lekin āñkhoñ se aañsū chhalakne lage sāmne jab hamārā mazār aa gayā

karo kaj jabīñ pe sar-e-kafan mire qātiloñ ko gumāñ na ho
ki ġhurūr-e-ishq kā bāñkpan pas-e-marg ham ne bhulā diyā

rahūñ ḳhamosh to phūloñ ko niiñd aa jaa.e
paḌhūñ jo sher to lafzoñ kā bāñkpan mahke