Tags-Baankpan

mire dil ko 'qaisar'-e-be-navā koī ġham shikast na de sakā
ki ulajh ke saikḌoñ hādse mire bāñkpan se chale ga.e

na savāl-e-jām na zikr-e-mai usī bāñkpan se chale ga.e
tirā zarf dekh ke tishna-lab tirī anjuman se chale ga.e

allāh rī dil-farebī jalvoñ ke bāñkpan kī
mahfil meñ vo jo aa.e kaj ho ga.iiñ kulāheñ

bāñkoñ ko bāñkpan ko milāo na ḳhaak meñ
tan tan ke yuuñ na apnā badan dekhte chalo

hujūm-e-dahr meñ badlī na ham se vaz-e-ḳhirām
girī kulāh ham apne hī bāñkpan meñ rahe

ḳharāsh-e-dard kā ā.īna huuñ mujhe dekho
ye bāñkpan bhī kahāñ hai kisī ke chehre par

kaif-e-adā bhī hai nigah-e-pur-fitan ke saath
lagtī hai dil pe choT magar bāñkpan ke saath

ham apne daur meñ jis bāñkpan se zinda haiñ
use ham ahl-e-mohabbat kā hausla kahiye

lākhoñ meñ ek niklī vaz-e-junūñ bhī apnī
ab bhī rahe na dab kar ham un se bāñkpan meñ

tujhī se daftaroñ meñ haiñ bahāreñ
tujhī se kursiyoñ meñ bāñkpan hai

piirī kamān kī jyuuñ maan.e nahīñ akaḌ kuuñ
hai zo.af biich duunā ab bāñkpan hamārā

desh kī ḳhātir ḳhushī se jo luTā dete haiñ jaañ
un shahīdān-e-vatan ke bāñkpan kī baat ho

dushman ke ghar se chal ke dikhā do judā judā
ye bāñkpan kī chaal ye nāz-o-adā kī hai

shoḳhī-mizāj us ke se ab tak ga.ī nahīñ
vaise hī bāñkpan haiñ vahī ġhola-dañgiyāñ

apnī apnī aag meñ āñkheñ jhulas kar rah ga.iiñ
tere lab ke phuul terā bāñkpan dekhegā kaun

āshiq hī ke jab na kaam aayā
kis kaam kā bāñkpan kisī kā

haañ kis ko hai mayassar ye kaam kar guzarnā
ik bāñkpan se jiinā ik bāñkpan se marnā

judā us ko na samjho kārvāñ se
'imām' ik bāñkpan se aa rahā hai

jo tere husn meñ narmī bhī bāñkpan bhī hai
vo kaif-e-tāza bhī hai nashsha-e-kuhan bhī hai

ye terā rañg-e-suḳhan terā bāñkpan ai 'shāz'
ki sher raas to aa.e anā bhī raas aa.e